اپوزیشن صرف اپنی کرپشن بچانے کیلیے سیاست کررہی ہے فواد چوہدری

خواجہ حارث نوازشریف کے وکیل نہ ہوتے تو وہ بھی مان جاتے کہ انہیں سزا ہونی چاہیے، فواد چوہدری

---

وفاقی وزیراطلاعات فواد چوہدری کا کہنا ہے کہ خواجہ حارث نے نوازشریف سے کروڑوں روپے فیس نہ لی ہوتی تو بھی یہ مان جاتے ہیں انہیں سزا ہونی چاہیے۔

ایکسپریس نیوز کے مطابق فواد چوہدری کے نوازشریف سے متعلق بیان پر ان کے وکیل خواجہ حارث نے احتساب عدالت سے نوٹس لینے کی استدعا کی جب کہ معاون وکیل زبیرخالد ایڈوکیٹ نے موقف اختیار کیا کہ وزیر صاحب عدالت پر اثر انداز ہونے کی کوشش کررہے ہیں جس پر فواد چوہدری کا رد عمل سامنے آگیا۔

خواجہ حارث سینئر وکیل ہیںاگر کروڑوں روپے فیس نہ لی ہوتی تو وہ بھی مان جاتے کہ کیس میں نواز شریف کو سزا ہونی چاہئے،بدقسمتی ہے ایسے فول پروف مقدمات ختم ہونے میں سالوں لگ جاتے ہیں۔اپوزیشن کے پاس کوئ لیڈرشپ ہے نہ نظریہ صرف پیسے بچانے کیلئےسیاست ہو رہی ہے،پچاس سے زیادہ جیل جائیں گے

— Ch Fawad Hussain (@fawadchaudhry) October 26, 2018

سماجی رابطے کی ویب سائٹ پر ٹوئٹ کرتے ہوئے وفاقی وزیراطلاعات کا کہنا تھا کہ خواجہ حارث سینئر وکیل ہیں اور اگر انہوں نے کروڑوں روپے فیس نہ لی ہوتی تو وہ بھی مان جاتے کہ اس کیس میں نواز شریف کو سزا ہونی چاہئے۔

اس خبر کو بھی پڑھیں؛ احتساب عدالت کا نوازشریف کے وکلا کوفواد چوہدری کیخلاف درخواست دائرکرنے کا حکم

فواد چوہدری کا کہنا تھا کہ بدقسمتی ہے ایسے فول پروف مقدمات ختم ہونے میں سالوں لگ جاتے ہیں جب کہ اپوزیشن کے پاس کوئی لیڈرشپ ہے نہ نظریہ وہ صرف پیسے بچانے کے لیے سیاست کررہے ہیں۔ انہوں نے مزید کہا کہ 50 سے زائد افراد جیل جائیں گے۔

واضح رہے گزشتہ روز ایک نجی ٹی چینل کے پروگرام میں بات کرتے ہوئے وفاقی وزیر نے کہا تھا کہ نوازشریف 100 فیصد جیل جائیں گے۔