آئی جی سندھ کا تھانوں کا دورہ سائلین کے مسائل سنے

خاتون کی درخواست کانوٹس نہ لینے پرعملے پر برہمی کا اظہار، کارروائی کا حکم

Raheel Salman October 27, 2018

پولیس تھانے آنے والے شہریوں کے مسائل ترجیحی بنیادوں پر حل کرے، کلیم امام۔ فوٹو:فائل

آئی جی سندھ کلیم امام نے مختلف تھانوں کادورہ کیا اور سائلین سے مسائل سنے۔

آئی جی کلیم امام نے جمعے کی صبح مبینہ ٹاؤن تھانے کا اچانک دورہ کیا اور سائلین سے ان کے مسائل سنے، ایک خاتون نے بتایا کہ وہ فلیٹ میں رہتی ہیں لیکن ایک سیاسی جماعت کے لوگ انھیں تنگ کر رہے ہیں جس پر انھوں نے تھانے میں متعدد مرتبہ تحریری درخواست دی لیکن کوئی شنوائی نہ ہوسکی جس پر آئی جی کلیم امام عملے پر برہم ہوگئے اور فوری کارروائی کا حکم دیا ۔

تھانے کے دوروں پر آئی جی سندھ نے روزنامچہ ، ایف آئی آر اور دیگر رجسٹرز کا بھی جائزہ لیا، انھوں نے پولیس افسران و اہلکاروں سے بھی بات چیت کی اور تھانے سے متعلق معلومات حاصل کیں،اس موقع پر آئی جی کا کہنا تھا کہ تھانے آنے والے افراد کے مسائل ترجیحی بنیادوں پر حل کریں۔