ملک بھر سے علم، ذوالجناح اور تعزئیے کے جلوس برآمد ہوں گے اور مجالس عزا کا انعقاد کیا جائے گا۔ فوٹو: فائل
نواسہ رسول ﷺحضرت امام حسین ؓاور شہدائے کربلا کا چہلم آج مذہبی عقیدت و احترام سے منایا جا رہا ہے۔
چہلم امام حسینؓ و شہدائے کربلا کے سلسلے میں آج نکلنے والے جلوسوں کے روٹس پر سیکیورٹی اہلکار تعینات ہیں۔ لاہورمیں تعزیہ کا مرکزی جلوس اندرون شہر حویلی الف شاہ سے برآمد ہوگا جو مقررہ راستوں سے ہوتا ہوا کربلا گامے شاہ اختتام پذیر ہو گا، جلوس کی سکیورٹی کے لئے 12 ہزار سے زائد سکیورٹی اہلکار تعینات ہیں۔ جلوس کے روٹ میں شامل تجارتی مراکز عارضی طور پر بند ہیں جب کہ شہر قائد، لاڑکانہ، نوابشاہ سمیت سندھ کے مختلف اضلاع میں موٹرسائیکل کی ڈبل سواری پربھی پابندی ہے۔
جلوس کے اختتام تک لوئر مال، پیر مکی یوٹرن ،ضلع کچہری، اندرون سرکلر روڈ، موری گیٹ تا چوک اسلامیہ اور لوئر مال سے ملحقہ شاہراہیں بند رہیں گی۔
پولیس حکام کے مطابق حفاظتی اقدامات کے پیش نظر شاہدرہ موڑتا ایم اے او کالج میٹروبس سروس معطل رہے گی جب کہ جلوس کے روٹ پر جیمرز کی مدد سے موبائل سروس بھی بند رکھی گئی ہے۔
سی سی پی اولاہورذوالفقارحمید کا کہنا ہے کہ تمام افراد کو چیکنگ کے بعد جلوس میں شامل ہونے دیا جائے گا، مرکزی کنڑول روم سے سیکیورٹی امور پر نظر رکھی جائے گی جب کہ چہلم کے جلوسوں کی سکیورٹی کے پیش نظر آج (منگل) کو ملک کے چاروں صوبوں میں موبائل فون سروس صبح 9بجے سے رات 9بجے تک معطل رہے گی۔
چہلم امام حسین ؓ کے سلسلے میں آج کراچی سمیت سندھ بھر میں اسکول اور کالج بند ہیں
دوسری جانب محکمہ تعلیم سندھ نے چہلم حضرت امام حسین ؓکے موقع پر تعلیمی ادارے بند ہیں۔ محکمہ تعلیم کی اسٹیئرنگ کمیٹی کے فیصلے کے مطابق چہلم کے موقع پرآج عام تعطیل کا اعلان کیا گیا ہے۔