اعظم سواتی کے علاوہ دیگر محرکات بھی آئی جی تبادلہ کی وجہ بنیں

آئی جی بھی اسٹیٹ منسٹرکے پولیس معاملات میں مداخلت کے طریقہ کار سے نالاں تھے۔

حیدر نسیم October 30, 2018

آئی جی بھی اسٹیٹ منسٹرکے پولیس معاملات میں مداخلت کے طریقہ کار سے نالاں تھے۔ فوٹو: فائل

آئی جی اسلام آباد پولیس کو ہٹانے کیلیے وفاقی وزیر سائنس اینڈ ٹیکنالوجی اعظم خان سواتی کی وزیر اعظم کو شکایت کے علاوہ دیگر محرکات بھی ا ن کے تبادلے کیوجہ بنے۔

ہفتہ وار تعطیل کے دن آئی جی اسلام آباد جان محمدکو ہٹائے جانے کی خبر ایکسپریس نے اتوارکو بریک کی توجو جنگل میں آگ کی طرح سوشل میڈیا پر بھی پھیل گئی۔ وزارت داخلہ نے آئی جی کوہٹانے اور اعظم سواتی کے معاملے سے لاتعلقی کی کمزورسی تردیدجاری کر دی اور وضاحت کی کہ تبادلے کی سمری کئی ہفتوں سے وزیر اعظم کے پاس پڑی ہے۔

اس بات کی نفی پیرکو سپریم کورٹ کے از خود نوٹس کی سماعت کے دوران سیکرٹری داخلہ میجر ریٹائرڈ اعظم سلیمان نے بیان دیتے ہوئے کردی اور تبادلے کو سیکریٹری اسٹیبلشمنٹ ڈویژن کا فیصلہ قرار دیتے ہوئے وزارت داخلہ کے وضاحتی بیان سے بری الذمہ ہوگئے۔

سیکریٹری اسٹیبلشمنٹ ڈویژن ڈاکٹر اعجاز منیر نے سپریم کورٹ میں ایکسپریس کی خبر کی تصدیق کرتے ہوئے کہا کہ وزیر اعظم کے زبانی حکم پرآئی جی کے تبادلے کا نوٹیفکیشن جاری کیا گیا۔ گوادرمیں موجود اعظم سواتی نے بھی ایکسپریس کی خبرکی تائیدکرتے ہوئے بیان دیاکہ انھوں نے وزیر مملکت اور وزیراعظم کو آئی جی کے رویے کی شکایت کی تھی۔

ذرائع کاکہناہے آئی جی جان محمدکو ہٹانے کے پیچھے مزید وجوہات میں وزیر مملکت داخلہ شہریار آفریدی کا رویہ بھی شامل ہے،وزیر مملکت داخلہ کے تھانوں میں چھاپوں کے حوالے سے آئی جی کا موقف تھا وزیر کسی بھی شکایت کی رپورٹ ملنے پر انھیں ہدایات دیں نا کہ خود تھانوں میں پہنچ کرکارروائی کریں، آئی جی نے صوبوں سے پولیس افسروں کو لاکر وفاقی دارالحکومت میں ایس ایچ او تعینات کرنے سے معذرت کی تھی۔