مظفرگڑھتاوان نہ ملنے پرماموں زاد کے ہاتھوں کزن اغوا کے بعد قتل ملزم گرفتار
اغوا اور قتل کے واقعے میں ملوث دونوں ملزمان نے اعتراف جرم کرلیا ہے۔ فوٹو : ایکسپریس نیوز
حماد پور میں تاوان نہ ملنے پر مغوی نوجوان کو قتل کردیا گیا، قتل کی اس واردات میں کوئی اور نہیں مغوی کا ماموں زاد ملوث نکلا ۔
ایکسپریس نیوز کے مطابق تین جون کو نامعلوم افراد نے حماد پور کے رہائشی عبدالحمید کے 22 سالہ بیٹے آصف جیلانی کواغوا کرلیا تھا جس کی رہائی کے لئے 50 لاکھ روپے تاوان طلب کیا گیا، پولیس نے تفیش کے دوران مغوی آصف جیلانی کے ماموں زاد محمد آصف کو شک کی بناء پر حراست میں لے لیا لیکن اسے معززین علاقہ کی ضمانت پر رہا کردیا گیا۔ تفتیش کا عمل آگے بڑھنے پر پولیس نے ایک اور ملزم سلیم کی نشاندہی پر محمد آصف کو دوبارہ گرفتارکیا گیا جس نے تاوان کے لئے آصف جیلانی کے اغوا اور اس کے قتل کا اعتراف کرلیا۔
تفتیشی افسران کا کہنا ہے کہ ملزمان نے آصف جیلانی کو اغوا کے روز ہی قتل کرکےاس کی لاش چھٹیوں کی وجہ سے بند سرکاری سکول کے باتھ روم میں چھپادی تھی جسے ملزمان ہی کی نشاندہی پر برآمد کرلیا گیا ہے۔