دادو کے قریب خوفناک ٹریفک حادثہ 8 افراد جاں بحق

تیز رفتار مسافر کوچ پیچھے سے ٹکرائی اور چاول کی بوریوں سے بھرے ٹریلر کے نیچے دھنس گئی۔ فوٹو: فائل

---

دادو کے قریب خوفناک ٹریفک حادثے میں 8 افراد جاں بحق اور 30 زخمی ہوگئے۔

ایکسپریس نیوز کے مطابق بدقسمت کوچ کو حادثہ کراچی سے لاڑکانہ جاتے ہوئے سندھ کے ضلع دادو کے قریب انڈس ہائی وے پر پیش آیا جہاں تیز رفتار مسافر کوچ پیچھے سے ٹکرا کر چاول کی بوریوں سے بھرے ٹریلر کے نیچے دھنس گئی جس کے نتیجے میں 8 مسافر جاں بحق اور 30 زخمی ہو گئے، جاں بحق اور زخمیوں میں خواتین اور بچے بھی شامل ہیں۔ اس کے علاوہ 4 زخمیوں کی حالت تشویشناک بتائی جارہی ہے۔

ایس ایس پی پرویز عمرانی نے بتایا کہ مسافر کوچ کا ڈرائیور جائے حادثہ سے فرار ہو گیا تاہم حادثے کے بعد امدادی کارروائیاں شروع کردی گئی ہیں جب کہ لاشوں اور زخمیوں کو فوری طور پر قریبی اسپتال منتقل کردیا گیا۔