قانون کی حکمرانی کیلئے حکومت کے ہر اقدام کی حمایت کریں گے شاہ محمود قریشی

تحریک انصاف قانون کی بالادستی پر یقین رکھتی ہے،وائس چیئرمین پی ٹی آئی۔ فوٹو: این این آئی

---

پاکستان تحریک انصاف کے رہنما اور قومی اسمبلی میں ڈپٹی پارلیمانی لیڈر مخدوم شاہ محمود قریشی نے کہا ہے کہ ان کی جماعت قانون کی حکمرانی اور آئین کی عملداری کے لئے حکومت کے ہر اقدام کی حمایت کرے گی۔

قومی اسمبلی میں خطاب کے دوران شاہ محمود قریشی کا کہنا تھا کہ تحریک انصاف آئین کو سب سے افضل اور اس کا احترام سب پر یکساں طور پر لازم سمجھتی ہے۔ اگر ملک میں جمہوری روایات کا فروغ اور اداروں کی مضبوطی اور جمہوریت کے تسلسل کو برقرار رکھنا ہے تو ہمیں آئین کی پاسداری اور قانون کی عمل داری کو بنیادی اصول بنانا ہوگا۔

شاہ محمود قریشی کا کہنا تھا کہ ملک کے ایوان 18 کروڑ عوام کی ترجمانی کرتے ہیں، وزیر اعظم کی جانب سے سابق صدر پرویز مشرف کے خلاف غداری کے مقدمے کے سلسلے میں سیاسی جماعتوں کو اعتماد میں لینے کی بات درست ہے۔ وہ تحریک انصاف کی جانب سے انہیں اپنی مکمل حمایت کا یقین دلاتے ہیں۔