امریکی شہر شکاگو کے اسپتال میں فائرنگ حملہ آورسمیت 4 افراد ہلاک

حملہ آور کی فائرنگ سے ہلاک ہونے والوں میں پولیس اہلکار اور ایک ڈاکٹر شامل ہیں۔ فوٹو: سوشل میڈیا

---

امریکا کے ایک اسپتال میں فائرنگ کرکے 3 افراد کو قتل کرنے والے حملہ آور کو گولی مار کر ہلاک کر دیا گیا۔

بین الاقوامی خبر رساں ادارے کے مطابق امریکا کے شہر شکاگو کے میرسی اسپتال میں حملہ آور نے فائرنگ کر کے پولیس اہلکار، خاتون ڈاکٹر اور اسپتال کے عملے کی ایک خاتون کو قتل کردیا۔ حملہ آور کی فائرنگ سے متعدد افراد زخمی بھی ہوئے۔ ہلاک اور زخمی ہونے والوں کو قریبی اسپتال منتقل کردیا گیا ہے۔

پولیس کا کہنا ہے کہ جوابی کارروائی میں حملہ آور بھی مارا گیا تاہم اس دوران ملزم کی فائرنگ سے ایک پولیس اہلکار بھی ہلاک ہوگیا۔ پولیس نے ایمرجنسی سروس طلب کرکے اسپتال کو خالی کرالیا ہے اورعلاقے کو گھیرے میں لے کر تلاشی شروع کردی گئی ہے۔

حملہ آور نے اسپتال کے کار پارکنگ میں فائرنگ کر کے ایک خاتون کو ہلاک کیا اور اس کے بعد اسپتال میں داخل ہوا۔ حملہ آور مقتول خاتون کو جانتا تھا اور فائرنگ سے قبل دونوں کے درمیان چند جملوں کا تبادلہ بھی ہوا تاہم قاتل اور مقتول کے درمیان رشتے کی نوعیت کا علم نہیں ہوسکا ہے۔