وزیراعظم 28 نومبر کو کرتارپور کوریڈور کا سنگ بنیاد رکھیں گے

وزیراعظم عمران خان تعمیراتی منصوبے کا آغازکریں گے فوٹو: فائل

---

پاکستان نے رواں ماہ کے آخر میں کرتارپور کوریڈور کی تعمیر شروع کرنے کا فیصلہ کیا ہے اور وزیراعظم عمران خان اس منصوبے کا افتتاح کریں گے جب کہ بھارت نے بھی کرتارپور بارڈر کھولنے کی منظوری دیتے ہوئے ڈیرہ بابا نانک سے پاکستان تک راستہ تعمیر کرنے کا فیصلہ کیا ہے۔

ایکسپریس نیوز کے مطابق وزیر خارجہ شاہ محمود قریشی نے اپنی ٹوئٹ میں کہا ہے کہ وزیراعظم عمران خان 28 نومبر کو کرتارپور کوریڈور کا سنگ بنیاد رکھیں گے، پاکستان بھارت کو کرتارپور کوریڈور کھولنے کے فیصلے سے پہلے ہی آگاہ کرچکا ہے، ہم سکھ یاتریوں کو پاکستان آمد پر خوش آمدید کہتے ہیں۔

یہ بھی پڑھیں: بھارت نے بھی کرتارپور بارڈر کھولنے کی منظوری دیدی

Pakistan has already conveyed to India it's decision to open Kartarpura Corridor for Baba Guru Nanak’s 550th birth anniversary. PM Imran Khan will do break ground at Kartarpura facilities on 28th November. We welcome the Sikh community to Pakistan for this auspicious occasion.

— Shah Mahmood Qureshi (@SMQureshiPTI) November 22, 2018

اس حوالے سے متروکہ وقف املاک بورڈ کے حکام نے بتایا کہ پاکستان نے رواں ماہ کے آخرمیں کرتارپورکوریڈور کی تعمیر پر کام شروع کرنے کا فیصلہ کیا ہے، بھارت سمیت دنیا بھر سے سکھ یاتری گورونانک دیوجی کا 549 واں جنم دن منانے پاکستان آئے ہیں، پاکستان اس موقع پر انہیں یہ تحفہ دینا چاہتا ہے، اس حوالے سے سروے بھی مکمل ہوچکا ہے۔ کوریڈورکا زیادہ حصہ (تقریباً ڈھائی کلومیٹرفاصلہ) پاکستان میں ہے۔

دوسری جانب مودی کابینہ نے بھی کرتار سنگھ بارڈر کھولنے کی منظوری دے دی ہے۔ نئی دہلی میں ٹوئٹر پر جاری بیان میں بھارتی وزیرِ داخلہ راج ناتھ سنگھ نے کہا کہ مشرقی پنجاب کے ضلع گرداسپور میں ڈیرہ بابا نانک سے پاکستان تک راستہ تعمیر کیا جائے گا، تاکہ گردوارہ دربار صاحب کرتارپور کی زیارت کے لیے جانے والے یاتریوں کو سہولت فراہم کی جاسکے، اس سلسلے میں ایک ٹرین بھی چلائی جائے گی جو مقدس مقامات سے گزرے گی۔

واضح رہے کہ رواں برس اگست میں جب سابق بھارتی کرکٹر نوجوت سنگھ سدھو وزیراعظم عمران خان کی حلف برداری تقریب میں شرکت کے لئے پاکستان آئے تھے تو اس موقع پرپاک فوج کے سربراہ نے انہیں کرتارپور کوریڈور کھولنے کی خوشخبری سنائی تھی۔