معصوم بچی کو ورغلا کر ساتھ لے جانے والا رکشا ڈرائیور رنگے ہاتھوں گرفتار

کورنگی عوامی کالونی میں معصوم بچی کو چیز کے بہانے ساتھ لے کر جانے والے رکشا ڈرائیور کو رنگے ہاتھوں گرفتار کرلیا گیا۔

ایکسپریس نیوز کے مطابق کم عمر معصوم بچیوں کو ہوس کا نشانہ بنانے والے ایک رکشا ڈرائیور کو کورنگی عوامی کالونی میں رنگے ہاتھوں گرفتار کرلیا گیا، ملزم 9 سالہ بچی کو کورنگی بدھ بازار کے قریب سے اغوا کرکے لے جارہا تھا کہ بچی کے رشتے دار نے دیکھ لیا جس پر ملزم کوپکڑلیا۔


پولیس کے مطابق ملزم نے معصوم بچیوں کو ہوس کا نشانہ بنانے کے لیے بہلا کر لے جانے کا اعتراف کرلیا اور اپنے اعترافی بیان میں بتایا کہ وہ معصوم بچیوں کو چیز دلانے کے بہانے ساتھ لے کر جاتا تھا۔

پولیس کے مطابق ملزم چار ماہ قبل ہی جیل سے ضمانت پر رہا ہوکر آیا ہے، واقعہ کا مقدمہ نو سالہ بچی کے اغوا کی دفعہ کے تحت والد کی مدعیت میں درج کرلیا گیا ہے۔