پاکستان سے تعلق کو کمزور کرنے کی ہرکوشش ناکام ہوگی چین

چین نے حملے کوناکام بنانے پر پولیس اہلکاروں اورآرمی کے اقدامات کو سراہا فوٹو فائل

---

چینی وزرات خارجہ نے کہا ہے کہ پاکستان سے تعلق کو کمزور کرنے کی ہر کوشش ناکام ہوگی۔

چین کی وزرات خارجہ کے ترجمان جینگ شوانگ کی جانب سے کراچی میں قائم چینی قونصل خانے پر ہونے والے دہشتگرد حملے کی شدید الفاظ میں مذمت کی گئی ہے جب کہ پاکستان کو اس حملے کے خلاف سخت اقدامات اٹھاتے ہوئے چینی عملے کی حفاظت کو یقینی بنانے پر زور دیا گیا۔

اس خبرکوبھی پڑھیں: چینی قونصل خانے پرحملہ ناکام بنادیا گیا، تمام دہشت گرد ہلاک

چینی وزارت خارجہ کی جانب سے چینی قونصل خانے پر ہونے والے دہشتگرد حملے کے خلاف پاکستان پولیس اور آرمی کی جانب سے کی جانے والی بروقت کارروائی کی تعریف کی گئی اور دہشتگردانہ منصوبے کو ناکام بنانے پر پولیس وآرمی کے اقدامات کو سراہتے ہوئے آپریشن کے دوران جام شہادت نوش کرنے والے اہلکاروں کی شہادت پر افسوس کا اظہار کیا گیا۔

چینی وزرات خارجہ کے ترجمان نے پریس بریفنگ کے دوران کہا کہ دہشتگرد حملہ پاک چین تعلقات اور سی پیک پر بالکل بھی اثرانداز نہیں ہوگا، پاکستان اور چین کے درمیان تعلقات پہلے کی طرح برقرار رہیں گے۔

The Chinese Embassy in Pakistan strongly condemns the terrorist attack against the Chinese Consulate-General in Karachi on November 23. Any attempt to undermine China-Pakistan relationship is doomed to fail. https://t.co/N1s4BIXOg0 pic.twitter.com/sO1xuUbmHB

— Chinese Emb Pakistan (@CathayPak) November 23, 2018

دوسری جانب چینی سفارتخانے کی جانب سے کی گئی ٹوئٹ میں بھی دہشتگرد حملے کی مذمت کرتے ہوئے کہا گیا کہ پاکستان اور چین کے تعلق کو کمزور کرنے کی ہر کوشش ناکام ہوگی۔

واضح رہے کہ کراچی کے علاقے کلفٹن میں پولیس اورسیکیورٹی اہلکاروں نے چینی قونصل خانے پر ہونےو الے دہشتگرد حملےکوناکام بناتے ہوئے تین دہشتگردوں کو ہلاک کردیا جب کہ آپریشن کے دوران دو اہلکاروں نے جام شہادت نوش کیا۔