یورپی یونین برطانیہ کے درمیان بریگزٹ پر معاہدہ ہوگیا

یورپی یونین کے رہنماؤں نے برسلز میں ایک خصوصی تقریب میں معاہدے پر دستخط کیے۔ فوٹو : ٹویٹر

---

یورپی یونین میں شامل تمام ممالک نے برطانیہ کی وزیراعظم تھریسامے کے 'بریگزٹ پلان' کی منظوری دے دی۔

بین الاقوامی خبر رساں ادارے کے مطابق یورپی یونین اور برطانیہ کے درمیان بریگزٹ ڈیل پر اتفاق ہو گیا ہے۔ یورپی یونین کے باقی ماندہ 27 رہنماؤں نے ایک خصوصی تقریب میں بریگزٹ ڈیل پر دستخط کردیئے ہیں۔

برسلز میں ہونے والی خصوصی تقریب میں یورپی یونین اور برطانوی وزیراعظم کے درمیان بریگزٹ ڈیل طے پا گئی ہے جس کے آدھے گھنٹے بعد ہی یورپیئن کونسل کے صدر ڈونلڈ ٹسک نے اپنی ٹوئٹ میں لکھا کہ ' یورپی یونین سے برطانیہ کے انخلاء اور مستقبل میں فریقین کے درمیان سیاسی اور خارجہ تعلقات پر معاملات طے پا گئے ہیں۔

EU27 has endorsed the Withdrawal Agreement and Political Declaration on the future EU-UK relations.

— Charles Michel (@eucopresident) November 25, 2018

یورپی یونین کے رہنماؤں کی بریگزٹ ڈیل کی منظوری کو برطانوی وزیراعظم کی بڑی کامیابی سمجھا جا رہا ہے، تاہم اصل امتحان اس ڈیل کو برطانوی پارلیمنٹ سے منظور کروانا ہے۔ وزیراعظم تھریسامے کو اس ڈیل پر اپنے رفقا، وزرا اور سیاسی حلیفوں کی مخالفت کا سامنا رہا ہے۔

My letter to the nation. #BackTheBrexitDeal pic.twitter.com/VGzNeeXoqg

— Theresa May (@theresa_may) November 24, 2018

برطانوی عوام نے جون 2016 میں ہونے والے ریفرنڈم میں یورپی یونین سے علیحدگی کا فیصلہ کیا تھا تاہم عمل درآمد میں حائل کٹھن مراحل کو طے کرنے میں ابھی مزید وقت لگے گا۔ ممکن ہے برطانیہ کا یورپی یونین سے 44 سالہ رفاقت کا خاتمہ 2019 میں مکمل ہو جائے گا۔