سندھ بھرمیں اعلان کے باوجود سی این جی اسٹیشن تاحال نہ کھل سکے

جو بسیں چل رہی ہیں ان میں شہری جانوروں کی طرح سفر کرنے پر مجبور ہیں، فوٹوفائل

---

ایسوسی ایشن کے اعلان کے باوجود سندھ بھرمیں سی این جی تاحال نہ کھل سکی جس کے باعث عوام کو شدید مشکلات کا سامنا ہے۔

کراچی، حیدرآباد اور سندھ میں سی این جی بند ہونے کی وجہ سے سڑکوں پر پبلک ٹرانسپورٹ انتہائی کم جب کہ ٹرانسپورٹ مافیا کی جانب سے کرایوں میں من مانے اضافے کے باعث شہری شدید پریشان ہیں۔ سرد ہواؤں اور ٹھنڈے موسم میں شہری بس اسٹاپ پر سواری کے منتظر ہیں تاہم پبلک ٹرانسپورٹ نہ ہونے کی وجہ سے جو بسیں چل رہی ہیں ان میں شہری جانوروں کی طرح سفر کرنے پر مجبور ہیں۔

سی این جی ایسوسی ایشن نے گزشتہ روز شہر بھر میں سی این جی کھولنے کا اعلان کیاتھا تاہم اعلان کے باوجود سی این جی تاحال نہ کھل سکی جس کے باعث آج بھی معمولات زندگی بری طرح متاثر ہوئے ہیں ۔ عوام اور ٹرانسپورٹرز نے سی این جی فوری کھولنے کا مطالبہ کیا ہے۔

دوسری جانب ذرائع کا کہنا ہے کہ آج سی این جی اسٹیشز کو گیس کی بحالی کا امکان ہے جس کے بعد سی این جی اسٹیشنز کو گیس کی فراہمی شروع ہوجائے گی۔

واضح رہے کہ سوئی سدرن گیس کمپنی نے صوبے بھر میں سی این جی سیکٹر کو گیس کی فراہمی غیرمعینہ مدت کے لیے بند کردی تھی، بعد ازاں گیس کا بحران مبینہ طورپرمصنوعی نکلا اور انکشاف ہوا کہ سندھ کی گیس پنجاب کو فراہم کی جارہی ہے۔