اسکول فیسوں میں 20 فیصد کمی کا تحریری فیصلہ جاری

اگر اسکول بند ہوا یا کسی طالب علم کو نکالا گیا تو سخت ایکشن لیا جائیگا، عدالت

Numainda Express December 16, 2018

اگر اسکول بند ہوا یا کسی طالب علم کو نکالا گیا تو سخت ایکشن لیا جائیگا، عدالت۔ فوٹو:فائل

سپریم کورٹ نے نجی اسکولوں کی فیس 20 فیصد کم کرنے کا تحریری فیصلہ جاری کرتے ہوئے 22 نجی اسکولوں کو اپنی فیس کم کرنے کا حکم دیدیا ہے۔

سپریم کورٹ کی جانب سے نجی اسکولوں کی فیس 20 فیصد کم کرنے کے فیصلے میں کہا گیا ہے کہ تمام نجی اسکول آئندہ تعلیمی سال کیلیے فیس میں 5 فیصد اضافہ کرسکتے ہیں تاہم فیس میں 6 سے 8 فیصد اضافہ ریگولیٹری باڈی کی اجازت سے مشروط ہوگا۔

عدالت نے اسکولوں کو گرمیوں کی چھٹیوں کی لی گئی فیس کو ایڈجسٹ یا 2ماہ میں واپس کرنیکا حکم دیتے ہوئے کہا ہے کہ کوئی بھی نجی اسکول بند نہیں ہوگا نہ کسی طالب علم کو نکالا جائیگا اور اگر اسکول بند ہوا یا کسی طالب علم کو نکالا گیا تو سخت ایکشن لیا جائیگا۔

فیصلے میں ایف بی آر کو کہا گیا ہے کہ وہ 22 تعلیمی اداروں کے ٹیکس کی جانچ پڑتال کرے اور ایف آئی اے کو اسکولوں کا ریکارڈ تحویل میں لینے کا حکم بھی دیا گیا ہے جبکہ واضح کیا گیا ہے کہ سپریم کورٹ کا عبوری حکم پہلے کے تمام احکامات پر تقویت رکھے گا۔