مغوی زمیندار تاوان دے کر رہا مقابلے میں بازیاب کرایا پولیس

چوٹیاروں ڈیم کے قریب بکسری کے مقام پر پولیس کا ڈاکوؤں سے مقابلہ ہوا جس کے دوران ڈاکو مغوی کو چھوڑ کر فرار ہوگئے. فوٹو: فائل

---

ISLAMABAD: 15 روز قبل اغوا کے گئے زمیندار محمد نواز باجوہ کی بازیابی کا پولیس کا دعویٰ ۔

تفصیلات کے مطابق باجوہ برادری کی معزز شخصیت، زمیندار محمدنواز باجوہ کو15 روز قبل شوگر مل سے گھر آتے ہوئے مسلح افراد نے کار سمیت اغوا کر لیا تھا۔ بتایا گیا ہے کہ مغوی کو لاکھوں روپے تاوان کی ادائیگی کے بعد رہائی ملی ہے۔ دوسری طرف ایس ایس پی سانگھڑ منیر احمد کھوڑو نے پریس کانفرنس کرتے ہوئے بتایا کہ محمد نواز باجوہ کے اغوا کے بعد پولیس نے مسلسل 5 روز تک مختلف مقامات پر چھاپے مارے، کئی افراد کو حراست میں لیا۔



خفیہ اطلاع پر چوٹیاروں ڈیم کے قریب بکسری کے مقام پر پولیس کا ڈاکوؤں سے مقابلہ ہوا جس کے دوران ڈاکو مغوی کو چھوڑ کر فرار ہوگئے جبکہ 10 افراد کو گرفتار کرکے5 بندوقیں 2 پستول برآمد کر لیے گئے ہیں۔ ایس ایس پی سانگھڑ نے بتایا کہ ایک بڑا گروہ ہے اغوا کی وارداتوں میں ملوث ہے،جسے جلد گرفتار کیا جائے گا۔مغوی نواز باجوہ نے بتایا کہ پولیس کے چھاپوں کے خوف سے مجھے ڈاکوؤں نے چھوڑا ۔اس موقع پر فیڈریشن آف کامرس کے ملک شیر محمد صوفی عبدالحق ، مغوی کے بھائی اختر باجوہ ،مختار احمد باجوہ ، شاہد باجوہ، محمد اشرف باجوہ، یوسف سیلری اور دیگر بھی موجود تھے۔