ایرانیوں کو پاکستانی شہریت دینے پر نادرا عملے کی گرفتاری کیلیے چھاپے

ملزمان گرفتاری کے ڈر سے روپوش ہوگئے ہیں،آئندہ چند روز تمام ملزمان کو گرفتار کرلیا جائے گا،ایف آئی اے

Staff Reporter December 21, 2018

نادرا کی رپورٹ میں ذمے دار قرار دیے جانیوالے 6 افسران، اہلکاروں اور ایجنٹوں کیخلاف مقدمہ درج کرلیا گیا۔ فوٹو: فائل

ایرانی شہریوں کو پاکستانی شہریت دینے کے معاملہ ثابت ہونے کے بعد ایف آئی اے نے نادرا افسران، اہلکاروں اور ایجنٹوں کے خلاف مقدمہ درج کرکے ملزمان کی گرفتاری کیلیے چھاپے مارنے کا سلسلہ شروع کردیا ہے۔

ایف آئی اے کے انسداد انسانی اسمگلنگ سرکل نے جمعرات کو نادرا کی رپورٹ میں ذمے دار قرار دیے جانے والے 6 افسران، اہلکاروں اور ایجنٹوں کے خلاف مقدمہ درج رشوت ستانی اور جعل سازی کا مقدمہ درج کرلیا تھا اور مقدمے میں نامزد ملزمان اور ان کے معاونت کرنے والے اہلکاروں اور ایجنٹوں کی گرفتاری کیلیے 3 چھاپہ مار ٹیمیں تشکیل دی تھیں، چھاپہ مار ٹیموں نے نادرا کے دفاتر اور نامزد ملزمان کے گھروں پر چھاپے مارے۔

ایف آئی اے ذرائع حکام کے مطابق ملزمان گرفتاری کے ڈر سے روپوش ہوگئے ہیں تاہم ایف آئی اے نے متعدد افراد کو حراست میں لے کر تفتیش شروع کردی ہے۔

ذرائع نے بتایا کہ ایف آئی اے حکام نے نامزد ملزمان اور ان کے ساتھیوں کی گرفتاری کیلیے ٹیکنیکل سپورٹ بھی حاصل کرلی ہے اور امکان ہے کہ آئندہ چند روز تمام ملزمان کو گرفتار کرلیا جائے گا۔