حامد انصاری کے بدلے بھارت میں قید پاکستانی شہری کو بھی رہائی کا پروانہ مل گیا

عمران وارثی 26 دسمبر 2003 کو ویزا لے کر بھارت گیا تھا، فوٹو: فائل

---

بھارتی خاتون سے شادی کرنے والے پاکستانی شہری عمران وارثی کو 10 سال جیل میں گزارنے کے بعد رہائی کا پروانہ مل گیا ہے اور انہیں چند روز میں واہگہ بارڈر بارڈر پر پاکستانی حکام کے حوالے کیا جائے گا۔

حامد انصاری کی رہائی کے جواب میں بھارت میں قید پاکستانی شہری عمران وارثی کو بھی رہائی کی نوید مل گئی ہے، کراچی کا رہائشی 36 سالہ عمران وارثی 10 سال سے بھارتی جیل میں ہے، عمران وارثی کو چند روز میں پاکستانی حکام کے حوالے کیے جانے کا امکان ہے۔ نئی دہلی میں پاکستانی ہائی کمیشن نے عمران وارثی کو رہا کیے جانے کی تصدیق کی ہے تاہم ابھی یہ طے نہیں ہوسکا کہ اسے کس دن پاکستان کے حوالے کیا جائے گا۔

عمران وارثی 26 دسمبر 2003 کو واہگہ بارڈرکے راستے ویزا لے کر بھارت گیا تھا، عمران وارثی بھارت میں اپنی کزن سے محبت کرتا تھا، اسی سے شادی کے لیے بھارت گیا،اس نے اپنی کزن سے شادی کے بعد واپس پاکستان آنے کی بجائے بھارت میں ہی قیام کرلیا۔

شادی کے بعد عمران وارثی کے 2 بچے بھی پیدا ہوئے، عمران کے سسرال والوں نے اسے واپس پاکستان آنے کی بجائے بھارت میں ہی قیام کا مشورہ دیا تھا اور اس نے بھارتی دستاویزات تیار کروالیں، عمران وارثی اپنی بھارتی بیوی اوربچوں کے ساتھ بھارت میں مقیم ہوگیا تاہم چند سال بعد اس کے چند سسرالی رشتہ داروں نے اس کے بارے مقامی پولیس کو آگاہ کردیا، 2007 میں عمران وارثی کو بھوپال سے گرفتار کرلیا گیا۔

بھارتی ایجنسیوں نے اس پرجاسوسی کا الزام لگا کر جیل بھجوا دیا، پاکستانی شہری کو 10 سال کی سزاسنائی گئی جو 19 جنوری 2018 کومکمل ہوگئی تھی ، سزا مکمل ہونے کے بعد بھی عمران وارثی کو رہا نہ کیا گیا، 14مارچ 2018 کو عمران وارثی کو جیل سے بھوپال کے ایک گارڈین سینٹر منتقل کردیا گیا، عمران وارثی اب شاہ جہاں آباد کے گارڈین سینٹرمیں ہے۔عمران وارثی کی رہائی کے لیے پاکستانی سہائی کمیشن اور مختلف این جی اوز نے بھی اہم کردار اداکیا ہے، عمران وارثی کی بیوی اور دو بچوں کا کیا ہوگا اس کا ابھی فیصلہ نہیں ہوسکا۔