گیس لوڈشیڈنگ وزارت پیٹرولیم کوغلط معلومات دیئے جانے کا انکشاف

اوگرا نے گیس لوڈ شیڈنگ کے حوالے سے انکوائری میں انکشاف کیا ہے کہ وزارت پیٹرولیم کو گیس کی پیداوار کے حوالے سے غلط معلومات فراہم کی گئیں۔

آئل اینڈ گیس ریگولیٹری اتھارٹی(اوگرا) نے سوئی ناردرن اور سوئی سدرن گیس کمپنیوں کے خلاف انکوائری مکمل کر لی ہے۔ اوگرا کی چیئرپرسن عظمی عادل سمیت تین رکنی ٹیم نے وزیراعظم عمران خان کے حکم پر تحقیقات کیں۔


رپورٹ میں انکشاف ہوا ہے کہ گیس کی پیداوار کے حوالے سے غلط معلومات فراہم کی گئیں، اور وزارتِ پیٹرولیم کو بتایا گیا کہ گیس کی پیداوار ٹھیک اور ایل این جی بھی سسٹم میں موجود ہے، اس لئے گیس کی لوڈ شیڈنگ نہیں ہوگی لیکن جب گیس لوڈ شیڈنگ ہوئی تو کہا گیا کہ پریشر کم ہوا ہے لوڈ شیڈنگ نہیں کی جارہی، جب کہ صوبہ پنجاب اور سندھ میں سردی کی آمد کے ساتھ ہی گیس لوڈ شیڈنگ شروع کر دی گئی۔

ذرائع وزارت پیٹرلیم کا کہنا ہے کہ انکوائری مکمل ہونے کے بعد رپورٹ وزارت پٹرولیم و قدرتی گیس کو ارسال کر دی گئی ہے، انکوائری رپورٹ کی روشنی میں ایم ڈی سوئی نادرن اور سوئی سدرن گیس کمپنی کے خلاف کارروائی عمل میں لائی جائے گی۔