رنویر سنگھ کی فلم ’گلی بوائے‘ کا پہلا پوسٹر جاری

فلم ’گلی بوائے‘ رواں سال 14 فروری کو سنیما گھروں کی زینت بنے گی (فوٹو: فائل)

---

بالی ووڈ کے چلبلے اداکار رنویر سنگھ اور عالیہ بھٹ کی فلم 'گلی بوائے ' کا پہلا پوسٹر جاری کردیا گیا۔

بالی ووڈ انڈسٹری پر ان دنوں چھائے رہنے والے رنویر سنگھ نے فلم 'سمبا' کی کامیابی کے بعد اپنی ایک اور نئی آنے والی فلم 'گلی بوائے' کا پہلا پوسٹر جاری کرکے مداحوں کو نیا سال کا تحفہ پیش کردیا۔

رنویر سنگھ کی جانب سے سماجی رابطے کی ویب سائٹ انسٹا گرام پر جاری کردہ فلم 'گلی بوائے' کے پوسٹر میں دیکھا جاسکتا ہے کہ رنویر سنگھ ہوڈی پہنے سورج کا سامنا کرتے ایک بلڈنگ کے عقب میں بیٹھے ہیں جب کہ ساتھ ہی انہوں نے یہ بھی لکھا کہ 'اپنا ٹائم آئے گا'۔

[instagram-post url="https://www.instagram.com/p/BsFrVCThvJG/"]

قبل ازیں رنویر سنگھ نے فلم 'گلی بوائے' سے متعلق اعلان کیا تھا کہ اُن کی آنے والی فلم 7 فروری سے برلن میں منعقد ہونے والے 69 ویں برلن انٹرنیشنل فلم فیسٹیول میں دکھائی جائے گی۔

[instagram-post url="https://www.instagram.com/p/BfAn-tEBbtu/"]

واضح رہے کہ زویا اختر کی ہدایت کاری میں بننے والی اس فلم میں رنویر سنگھ کے ساتھ پہلی بار عالیہ بھٹ اداکاری کے جوہر دکھاتی نظر آئیں گی۔ فلم کی کہانی اسٹریٹ ریپر کی زندگی پر مبنی ہے جب کہ فلم رواں سال 14 فروری کو سنیما گھروں کی زینت بنے گی۔