قادر خان کے بیٹے نے گووندا کی منافقت کا پول کھول دیا

خود کو قادر خان کا بیٹا کہنے والے گووندا نے ایک بار بھی فون کرکے ان کی خیریت تک دریافت نہیں کی، سرفراز خان

ویب ڈیسک January 03, 2019

قادر خان کے آخری سال بہت تکلیف میں گزرے، سرفراز خان فوٹو: فائل

بالی ووڈ کے لیجنڈ اداکار قادر خان کے بیٹے سرفراز خان نے بالی ووڈ فنکاروں کی بے حسی پر اپنے غصے کااظہار کرتے ہوئے کہا ہے کہ خود کو میرے والد کا بیٹا کہنے والے گووندا نے آج تک انہیں فون نہیں کیا۔

بالی ووڈ کے مرحوم اداکار و مصنف قادر خان کے ساتھ متعدد فلموں میں کام کرنےوالے اداکار گووندا نے ان کی موت پر افسوس کا اظہار کرتے ہوئے کہا تھا کہ قادر خان نا صرف ان کے استاد تھے بلکہ وہ ان کے والد کی طرح تھے۔

https://twitter.com/govindaahuja21/status/1080057963669217281

گووندا کے اس بیان پر قادر خان کے بیٹے سرفراز خان نے ہنستے ہوئے بالی ووڈ اداکاروں کی بے حسی بیان کرتے ہوئے کہا ہے کہ ''مہربانی کرکے گووندا سے پوچھیں کہ خود کو قادر خان کا بیٹا کہنے والے نے انہیں کتنی بار فون کرکے ان کی صحت کے متعلق پوچھاتھا، یہاں تک کہ انہوں نے میرے والد کے گزر جانے کے بعد ایک بار بھی فون نہیں کیا۔''

اس خبرکوبھی پڑھیں: ' قادرخان زندگی کے آخری دنوں میں اکیلے رہ گئے تھے'

سرفراز نے مزید کہا کہ ''میرے والد بالی ووڈ میں بہت سارے لوگوں کے قریب تھے لیکن امیتابھ بچن کے ساتھ ان کا خاص تعلق تھا، وہ بچن صاحب سے بے حد محبت کرتے تھے۔ والد کی بیماری کے دوران میں نے ان سے پوچھا تھا کہ آپ بالی ووڈ میں سب سے زیادہ کسے یاد کرتے ہیں تو انہوں نے کہا تھا کہ وہ امیتابھ بچن کو بہت یاد کرتے ہیں۔ میں چاہتاہوں بچن صاحب کو یہ بات معلوم ہو کہ میرے والد آخری وقت تک صرف ان کے بارے میں ہی باتیں کرتے رہتے تھے۔''

خوش قسمتی سے میرے والد کے تین بیٹے آخری وقت میں ان کی دیکھ بھال کے لیے موجود تھے جب وہ اس دنیا سے گئے ان کے چہرے پر مسکراہٹ تھی، میرے والد کے آخری سال بہت تکلیف میں گزرے لیکن ہم نے انہیں کینیڈا میں بہترین علاج فراہم کیا۔

واضح رہے کہ اپنے چاہنے والوں کو سوگوار چھوڑ کر ہمیشہ کے لیے اس دنیا سے رخصت ہوجانے والے قادر خان کو کینیڈا میں سپرد خاک کردیا گیا ہے۔