کراچی لائنزایریا میں نامعلوم افراد کی فائرنگ سے ایس پی کرائم برانچ ملک مقصود زخمی

حملے میں ملک مقصود کوبازو اورپیٹ میں گولیاں لگیں، انہیں فوری طورپرجناح اسپتال پہنچایا گیا ، فوٹو: ایکسپریس نیوز

---

PESHAWAR: لائنزایریا میں نامعلوم افراد نے ایس پی کرائم برانچ ملک مقصود پر فائرنگ کرکے ان کو زخمی کردیا جبکہ اسپتال انتظامیہ کے مطابق ملک مقصود کی حالت خطرے سےباہر ہے۔

ایکسپریس نیوز کے مطابق کارسوارحملہ آوروں نے کراچی کے علاقے لائنزایریا میں ایس پی کرائم برانچ ملک مقصود کواس وقت نشانہ بنایا جب وہ اپنے دفترجارہے تھے، حملے میں ملک مقصود کوبازو اورپیٹ میں گولیاں لگیں، انہیں فوری طورپرجناح اسپتال پہنچایا گیا جہاں ان کی حالت خطرے سے باہرہے۔

ملک مقصود کے گن مین رؤف نے میڈیا سے گفتگوکرتے ہوئے بتایا کہ سفید اورکالے رنگ کی دوگاڑیوں نےگھرسےنکلتے ہی ملک مقصود کاتعاقب شروع کردیا تھا اور لائنزایریا کے علاقے میں کار میں سوار نامعلوم افراد نے ان پر فائرنگ کردی۔

واضح رہے ایس پی ملک مقصود نے سپریم کورٹ میں پولیس میں آؤٹ آف ٹرن پروموشن کے خلاف درخواست دائرکررکھی ہے جبکہ انہوں نے کراچی میں لینڈمافیا کے بارے میں ایک رپورٹ بھی سپریم کورٹ میں جمع کرائی ہے۔