گیس بحران پر سوئی ناردرن اور سوئی سدرن کے ایم ڈیز کو ہٹا دیا گیا

وزیر اعظم نے سوئی سدرن اور سوئی ناردن کے سربراہان کو عہدوں سے فوری ہٹانےکا اعلان کیا ہے، وزیر اطلاعات

ویب ڈیسک January 09, 2019

کابینہ کمیٹی نے دونوں ایم ڈیز کی فوری طور پر برطرفی کی سفارش کردی ہے، ذرائع ۔ فوٹو : فائل

لاہور: وزیراعظم عمران خان کی ہدایت پر سوئی ناردرن اور سوئی سدرن کے ایم ڈیز کو برطرف کر دیا گیا۔

ایکسپریس نیوز کے مطابق وزیراعظم عمران خان کو گزشتہ ماہ پیش آنے والے گیس بحران کی انکوائری رپورٹ پیش کی گئی جس میں گیس بحران کے ذمہ داروں کا تعین کیا گیا۔

یہ بھی پڑھیں :سوئی سدرن اورسوئی ناردرن کے سربراہان کیخلاف تحقیقات کا حکم

رپورٹ میں سوئی ناردرن اور سوئی سدرن کے ایم ڈیز کو گیس کے بحران کے ذمہ دار قرار دیا گیا، ایم ڈیز کی برطرفی کی سفارشات وزارت پٹرولیم کو ارسال کی گئیں اور اب دونوں ایم ڈیز کو عہدوں سے ہٹادیا گیا ہے۔

حالیہ دنوں میں عوام کو گیس کے شدید بحران کا سامنا رہا، وزیر اعظم نے گیس کے بحران کی ذمہ داری کے تعین کیلئے کمیٹی تشکیل دی اس انکوئری کمیٹی کی رپورٹ کل وزیر اعظم کو پیش کی گئ اس رپورٹ کے مد نظر وزیر اعظم نے سوئ سدرن اور سوئ ناردن کے سربراھان کو عہدوں سے فوری ہٹانےکا اعلان کیا ہے
— Ch Fawad Hussain (@fawadchaudhry) January 9, 2019

وفاقی وزیر اطلاعات فواد چوہدری نے ٹوئٹ میں لکھا کہ گیس بحران کے ذمہ داروں کے تعین کے لیے انکوائری کمیٹی کی رپورٹ پر گزشتہ روز وزیر اعظم نے سوئی سدرن اور سوئی ناردن کے سربراہان کو عہدوں سے فوری ہٹانےکا اعلان کیا ۔