قزاقوں کی قیدسے رہائی پانیوالوں نے اہلخانہ کیساتھ عید منائی

بہت خوشی ہوئی،گورنرکی صحت کیلیے دعائیں کیں،جاوید سلیم،شہنازودیگر. فوٹو: اے ایف پی

---

KARACHI: صومالی قزاقوں سے رہائی پانے والے بحری جہاز ایم وی البیڈو کے عملے نے اہل خانہ کے ہمراہ بھرپور عید منائی ، عزیز و اقارب اور رشتے داروں کی آمدورفت کی وجہ سے ان کی رہائش گاہوں پر میلے کا سا سماں رہا ،ان کی 3 عیدیں قزاقوں کی قید میں گزریں ، ان کا کہنا ہے کہ اس مرتبہ حقیقی معنوں میں انھیں عید کی خوشیاں ملیں ، بیرون شہر سے تعلق رکھنے والے عملے کے ارکان نے آبائی علاقوں میں عید منائی۔

تفصیلات کے مطابق صومالی قزاقوں سے رہائی پانے والے بحری جہاز ایم وی البیڈو کے عملے نے اپنے اہل خانہ کے ہمراہ بھرپور عید منائی،ایکسپریس سے گفتگو کرتے ہوئے کپتان جاوید سلیم نے کہا کہ قید کے دوران عید کا مزہ کرکرا ہوگیا تھا ، قزاقوں کی قید میں ان کی 3 عیدیں گزریں جس کے بعد اس مرتبہ عید پر انھیں حقیقی معنوں میں اپنے اہل خانہ کے ہمراہ عید منانے کی خوشیاں حاصل ہوئیں ، ان کے اہل خانہ بھی اس موقع پر انتہائی مسرور دکھائی دیے ، کپتان کی اہلیہ مسز شہناز نے بتایا کہ عید کے موقع پر انھوں نے جاوید کے پسندیدہ پکوان بنائے اور ان کی خوب خاطر تواضع کی جبکہ مہمانوں کی آمدورفت کی وجہ سے میلے کا سا سماں رہا،گورنرسندھ کی صحت کیلیے دعائیں کیں۔

چیف افسر مجتبیٰ نے اپنے آبائی علاقے مانسہرہ میں اہل خانہ کے ہمراہ عید منائی ، ایکسپریس سے گفتگو کرتے ہوئے انھوں نے کہا کہ اپنے بچوں کے ہمراہ عید منانے کی انھیں بہت زیادہ خوشی ہوئی ،حرا ، بختاور ، سلویٰ اور عبداللہ بھی انتہائی خوش ہیں ، انجینئر ذوالفقار علی نے بھی اہل خانہ کے ہمراہ عید کا بھرپور لطف اٹھایا، سی مین فقیر محمد نے کہا کہ عید الفطر کے پرمسرت لمحات اپنوں کے ساتھ گزارنے کا بھرپور مزہ آیا،عملے کے دیگر ارکان کاشف اور راحیل انور نے دیر اور جہلم میں اہل خانہ کے ہمراہ عید منائی ۔