وزیراعظم کی قطری ہم منصب سے ملاقات دو طرفہ تعلقات اور اقتصادی تعاون پر بات چیت

وزیراعظم دورہ کے دوران پاکستان میں قطر کی سرمایہ کاری پر بات چیت کریں گے، ذرائع ۔ فوٹو : اے پی پی

---

وزیراعظم عمران خان کی قطری ہم منصب عبداللہ بن ناصر سے ملاقات ہوئی جس میں دو طرفہ تعلقات اور دونوں ممالک میں اقتصادی تعاون پر بات چیت کی گئی۔

وزیراعظم عمران خان 2 روزہ دورہ پر قطر پہنچے جہاں ان کا قطرکے وزیر خارجہ سلطان بن سعد نے استقبال کیا، وزیر خارجہ شاہ محمود قریشی، وزیر خزانہ اسد عمر، مشیرتجارت عبدالرزاق داؤد، ذلفی بخاری، ہارون شریف اور ندیم بابر بھی وزیراعظم کے ہمراہ ہیں۔

دریں اثنا وزیراعظم عمران خان کی قطری ہم منصب عبداللہ بن ناصر سے ملاقات ہوئی جس میں دو طرفہ تعلقات اور دونوں ممالک میں اقتصادی تعاون پر بات چیت کی گئی، ملاقات میں شاہ محمود قریشی، اسد عمر، غلام سرور خان، عبدالرزاق داؤد، ذلفی بخاری اور دیگر بھی شریک تھے۔ ملاقات کے بعد قطری وزیراعظم نے عمران خان اور ان کے وفد کے اعزاز میں عشائیہ بھی دیا۔

وزیر اعظم پاکستان عمران خان کی قطر کے وزیر اعظم عزت مآب عبداللہ بن نصر بن خلیفہ الثانی سے دوحہ میں ان کی رہائش گاہ پر ملاقات
جناب عبداللہ بن نصر بن خلیفہ الثانی ریاست قطر کے وزیر داخلہ بھی ہیں@ImranKhanPTI#PMIKVisitsQatar pic.twitter.com/ISB8Uvk2dz

— PTI (@PTIofficial) January 21, 2019

ذرائع کے مطابق وزیراعظم دورہ کے دوران پاکستان میں قطر کی سرمایہ کاری اور ایل این جی کی قیمت میں رعایت کے لیے بات چیت کریں گے۔

ذرائع کے مطابق وزیراعظم کا دورہ سرمایہ کاری اور دونوں ممالک کے روابط کو مربوط بنانے میں کلیدی ثابت ہوگا، اس کے علاوہ قطر ہنر مند پاکستانیوں کو روز گار کے مواقع فراہم کرنے کے لیے معاہدے پر دستخط بھی کرے گا جب کہ قطر گوادر میں فروزن فروٹ کے لیے اسٹوریج یونٹ قائم کرے گا۔