آصف علی زرداری کو اللہ کا آسرا ہے ترجمان پیپلز پارٹی

آصف زرداری کسی مخلوق کی نہیں بلکہ عوام کی حمایت سے پہلے بھی مقدمات سے سرخرو ہوچکے ہیں، مولابخش چانڈیو فوٹو:فائل

---

پاکستان پیپلز پارٹی کے مرکزی ترجمان مولابخش چانڈیو نے شیخ رشید کے بیان پر ردعمل میں کہا ہے کہ آصف علی زرداری کسی آمر کے آگے نہیں جھکتے کیونکہ انہیں اللہ کا آسرا ہے۔

پاکستان پیپلز پارٹی کے مرکزی ترجمان اور سیکریٹری اطلاعات سینیٹر مولابخش چانڈیو نے کہا کہ آصف علی زرداری آمروں اور کٹھ پتلیوں کے بنائے مقدمات سے سرخرو ہوچکے ہیں، وہ کسی اور مخلوق کی نہیں بلکہ اللہ اور عوام کی حمایت سے سرخرو ہوئے۔

یہ بھی پڑھیں: آصف زرداری کو اللہ کے سوا کوئی نہیں بچاسکتا، شیخ رشید

سینیٹر مولابخش چانڈیو نے کہا کہ آج بھی آصف علی زرداری کے خلاف وہی باتیں کر رہے ہیں جو آمروں کے قدموں میں پڑے رہے، یہ وہی لوگ ہیں جو ضیا اور مشرف جیسے آمروں کے آگے جھکے رہے۔

مولابخش چانڈیو کا کہنا تھا کہ آصف علی زرداری کو اللہ کا آسرا ہے اس لئے وہ کسی آمر اور کٹھ پتلی کے آگے نہیں جھکتے، پہلے بھی آصف علی زرداری جھوٹے مقدمات سے بری ہوئے اب بھی سرخرو ہوں گے۔

واضح رہے کہ کراچی میں پریس کانفرنس کرتے ہوئے شیخ رشید نے کہا ہے کہ آصف زرداری کا کیس نواز شریف اور شہباز شریف سے ایک لاکھ گنا زیادہ خطرناک ہے، انہیں اللہ کے سوا اب کوئی نہیں بچاسکتا۔