اسٹیل مل کے مسائل کے حل کیلیے حکومت سے فوری رابطے کا فیصلہ

اجلاس کے دوران سی ای او پاکستان اسٹیل نے ملازمین کی تنخواہوں کے معاملے کو انتہائی اہم ترین قرار دیا۔ فوٹو: فائل

---

MATLI: پاکستان اسٹیل کے قائمقام چیف ایگزیکٹو آفیسر سعادت چیمہ نے گزشتہ روز ہفتہ وار تعطیل کے باوجود ادارے کے سینئر افسران سے ملاقات اور اہم اجلاس کی صدرات کی جس میں پاکستان اسٹیل کے معاملات کو حل کرنے کے لیے حکومت سے فوری رابط کرنے کا فیصلہ کیا گیا۔

اجلاس کے دوران سی ای او پاکستان اسٹیل نے ملازمین کی تنخواہوں کے معاملے کو انتہائی اہم ترین قرار دیا اور یہ فیصلہ کیا گیا کہ ان تجاویز کو وزارت صنعت و پیداوار کے ذریعے فوری طور پر وزارت خزانہ تک پہنچایا جائے گا تاکہ آئندہ چند روز میں متوقع ''ای سی سی''اجلاس میں ان تجاویز کا جائزہ لیا جائے اور فوری عملدرآمد کرایا جاسکے۔



اس سلسلے میں قائمقام سی ای او سعادت چیمہ نے اس امید کا اظہار کیا کہ پاکستان اسٹیل مل ایک قومی ادارہ ہے اور اس سے ہزاروں افراد کا روز گار وابستہ ہے اور اس ادارے میں آج بھی اپنے پیروں پر کھڑا ہونے کی بھرپور صلاحیت موجود ہے اور پاکستان اسٹیل سے منسلک افسران اور کارکنان ادارے کا اہم ترین قیمتی اثاثہ ہیں۔