فلم ارتھ کے پاکستان ميں ری میک پربھارتی فلم ساز کلجیت پال کا اعتراض

پاکستان میں فلم ارتھ کے ری میک کا مقصد دونوں ممالک کے درمیان تعلقات کو سنیما کے ذریعے بہترکرنا ہے مہیش بھٹ فوٹو: فائل

---

مہیش بھٹ کی 1982 میں بننے والی فلم "ارتھ" کے پاکستان ميں ری میک پربھارتی فلم ساز کلجیت پال نے اعتراض کردیا ہے تاہم مہیش بھٹ کا کہنا ہے کہ ان کا اعتراض بے بنیاد ہے۔

مہیش بھٹ نے بھارتی اخبار سے بات کرتے ہوئے کہا کہ انہوں نے پاکستانی اداکار اور ہدایت کارشان کو فلم کی اردو زبان میں تیاری کی اجازت دی ہے، یہ کوئی کمرشل فلم نہیں ہے اس لیے اس میں کسی قسم کی رقم کا لین دین نہیں ہوا، فلم کا مقصد دونوں ممالک کے درمیان تعلقات کو سنیما کے ذریعے بہترکرنا ہے، نئے کاپی رائٹ قانون کے حوالے سے انہوں نے کہاکہ جس حدتک وہ قانون کو سمجھتے ہیں تو فلم کے رائٹر کے پاس ہی فلم کے تمام حقوق ہوتے ہیں۔

مہیش بھٹ کا مزید کہنا تھا کہ کلجیت پال نے فلم کے ہندی میں دوبارہ بننے پر اعتراض کیا تاہم انہیں فلم کے اردو میں بننے پرکسی بھی قسم کا کوئی اعتراض نہیں تھا، کلجیت پال نے مجھ سے کہا تھا کہ وہ فلم کے ہندی زبان ميں دوبارہ بننے کے حق میں نہیں ہیں تاہم جب انہیں یہ بتایا گیا کہ فلم کا ری میک مکمل طور پر اردو زبان ميں ہوگا تو انہوں نے اس پر رضامندی ظاہر کی۔

فلم کے ری میک کی شوٹنگ لاہور کی جائے گی جس کے لیے شان جو خود فلم میں مرکزی کردار ادا کریں گے نے اپنے ساتھ لیڈنگ رول کے لئے عمائمہ ملک اور عظمیٰ حسین کا انتخاب کیا ہے۔