محمد سمیع پی ایس ایل 4 کے لیے اسلام آباد یونائیٹڈ کے کپتان مقرر

فاسٹ بولر محمد سمیع کو پی ایس ایل 4 کے لیے اسلام آباد یونائیٹڈ کے کپتان مقرر کیا گیا ہے۔

محمد سمیع کو قیادت سپرد کرنے کا اعلان اسلام آباد یونائیٹڈ کے مالک علی نقوی نے پریس کانفرنس کے دوران دکھائے گئے ویڈیو پیغام میں کیا۔ شاداب خان کو پہلے ہی نائب کپتان مقرر کیا جا چکا ہے۔


اس موقع پر میڈیا سے بات کرتے ہوئے محمد سمیع نے کہا کہ کپتان کی ذمہ داری کا اہل سمجھنے والی فرنچائز انتظامیہ کا شکر گزار ہوں، پوری کوشش کروں گا کہ اسلام آباد یونائیٹڈ کی کارکردگی کا معیار پی ایس ایل 4 میں بھی برقرار رہے۔

محمد سمیع نے کہا کہ قومی ٹیم کی نمائندگی کرنے والے شاداب خان کے نائب کپتان ہونے سے ان پر کوئی دباؤ نہیں ہوگا، آل راؤنڈر کی معاونت سے ٹیم کو فتوحات کی راہ پر گامزن رکھنے کی کوشش کروں گا، شاداب خان کو مستقبل کے لیے تیار کر رہے ہیں، نوجوان لیگ سپنر نے آنے والے وقت میں قیادت سنبھالنا ہے۔