ٹریفک حادثات میں خاتون سمیت 4 افراد ہلاک

انو بھائی پارک کے قریب بس کی ٹکر سے موٹر سائیکل پر سوارخاتون ہلاک، والد اور والدہ زخمی، موٹر سائیکل سلپ ہونے سے ایک شخص جاں بحق۔ فوٹو: آن لائن

---

BERLIN: ٹریفک حادثات میں خاتون سمیت4 افراد ہلاک جبکہ میاں بیوی زخمی ہوگئے، تفصیلات کے مطابق ناظم آباد 7 نمبرA.O کلینک کے سامنے واٹر ٹینکر نمبرTTA-638 کی ٹکرسے موٹرسائیکل نمبرHDJ-3397 پر سوار مہتشم ولد ریاض احمد ہلاک جبکہ اس کا دوست سیف الرحمان ولد حبیب الرحمان زخمی ہوگیا ،اطلاع ملنے پر پولیس موقع پرپہنچ گئی اورحادثے کے ذمے دار واٹر ٹینکرکے ڈرائیورکو حراست میں لے کر ہلاک و زخمی ہونے والوں کو چھیپا ایمبولینس کے ذریعے عباسی شہید اسپتال پہنچایا گیا۔

ناظم آباد تھانے کے اے ایس آئی عمران نے بتایا کہ ہلاک و زخمی ہونے والے ناظم آباد نمبر2کے رہائشی ہیں، واقعے کے وقت مہتشم والد کی موٹر سائیکل چلا رہا تھا جبکہ اس کا دوست سیف الرحمان ساتھ بیٹھا تھا جبکہ واٹر ٹینکر سخی حسن کے ہائیڈرنٹ سے پانی لے کر شیرشاہ میں واقع احمد ٹیکسٹائل مل جا رہا تھا ، پولیس نے حادثے کے ذمے دار واٹر ٹینکر کو قبضے میں لے کر ڈرائیور لال زادہ ولد شیریں کے خلاف مقدمہ درج کر لیا جبکہ ناظم آباد کے علاقے6 نمبر انو بھائی پارک کے سامنے نامعلوم منی بس کی ٹکر سے موٹر سائیکل نمبرKEK-8368پر سوار35 سالہ بلقیس زوجہ اقبال ہلاک جبکہ اس کے والد عبدالستار اور والدہ نسیم بانو زخمی ہوگئی ،ہلاک و زخمی ہونے والوںکو عباسی شہید اسپتال پہنچایا گیا۔

پولیس کے مطابق میاں بیوی اور ان کی بیٹی قیوم آباد کے رہائشی اور ایک ہی موٹر سائیکل پر سوار تھے جبکہ ماڑی پور کے علاقے حب ریور روڈ لکی چڑھائی کے قریب نامعلوم گاڑی کی ٹکر سے35 سالہ کاشف ولد جواد خان ہلاک ہو گیا، متوفی کی لاش سول اسپتال پہنچائی گئی، متوفی بلدیہ ٹاؤن رشید آباد کا رہائشی تھا جبکہ عزیز بھٹی کے علاقے گلشن اقبال میں یونیورسٹی روڈ بیت المکرم مسجد کے قریب موٹر سائیکل سلپ ہونے سے40 سالہ عقیل ولد خلیل زخمی ہو گیا جسے طبی امداد کے لیے اسپتال لے جایا جا رہا تھا کہ دوران سفر زخموں کی تاب نہ لاتے ہوئے ہلاک ہوگیا، متوفی کی لاش ورثا پولیس کارروائی کے بغیر لے گئے۔