پشاور ڈپٹی کمانڈنٹ ایف آر پی قاتلانہ حملے میں زخمی محافظ اور ڈرائیور جاں بحق

ڈپٹی کمانڈنٹ ایف آر پی گل ولی خان گلبہار میں واقع اپنے گھر سے دفتر جانے کے لئے نکلے تھے کہ انعم صنم چوک پر نامعلوم مسلح موٹرسائیکل سواروں نے ان کی گاڑی پر اندھا دھند فائرنگ کر دی۔ فوٹو ایکسپریس نیوز

---

نامعلوم افراد کی فائرنگ سے ڈپٹی کمانڈنٹ فرنٹیئر ریزرو پولیس گل ولی خان زخمی جبکہ ان کا محافظ اور ڈرائیور جاں بحق ہو گئے۔

ڈپٹی کمانڈنٹ ایف آر پی گل ولی خان پشاور کے علاقے گلبہار میں واقع اپنے گھر سے دفتر جانے کے لئے نکلے تھے کہ انعم صنم چوک پر نامعلوم مسلح موٹرسائیکل سواروں نے ان کی گاڑی پر اندھا دھند فائرنگ کر دی جس کے نتیجے میں گل ولی خان زخمی جبکہ ان کا ڈرائیور اور محافظ موقع پر ہی جاں بحق ہوگئے، پولیس کے مطابق گل ولی خان نے زخمی ہونے کے باوجود نامعلوم موٹرسائیکل سواروں پر جوابی فائرنگ کی جس پر وہ فرار ہوگئے۔

ڈپٹی کمانڈنٹ گل ولی کو لیڈی ریڈنگ اسپتال منتقل کردیا گیا، اسپتال انتظامیہ کے مطابق گل ولی خان کو سینے اور ٹانگ میں دو گولیاں لگی ہیں اور انہیں طبی امدادی دی جا رہی ہے جبکہ ان کے ڈرائیور مکمل شاہ اور محافظ یوسف کی لاشیں پوسٹ مارٹم کے لئے خیبر میڈیکل کالج منتقل کر دی گئیں، پولیس نے جائے وقوعہ سے شواہد اکٹھے کرکے تحقیقات شروع کردی ہیں جبکہ مختلف مقامات پر ناکہ بندیاں کر کے ملزمان کی تلاش بھی شروع کر دی گئی ہے۔