گوجرانوالہ میں ملزم کے اہل خانہ اوروکلا میں جھگڑا احاطہ عدالت میدان جنگ بن گیا

ملزم کے اہل خانہ اوروکلا کے درمیان جھگڑے سے احاطہ عدالت میدان جنگ بن گیا جبکہ اس دوران بیچ بچاؤ کرانے کے لئے آنے پولیس اہلکاروں کو بھی تشدد کا نشانہ بنایا گیا۔


ایکسپریس نیوز کے مطابق سول جج محمدآصف کی عدالت میں تھانہ سیٹلائٹ ٹاؤن کا ایک مقدمہ زیرِسماعت تھا کہ ملزم تنظیم عباس کی بہنوں نجمہ، نغمہ، نیلم اوربھائی ندیم عباس نے عدالت میں ہنگامہ شروع کردیا ، جس پر عدالت میں موجود وکیل مہرمشتاق نے انہیں روکنے کی کوشش کی توملزم کے اہل خانہ نے وکیل کوتشدد کا نشانہ بناڈالا۔

وکیل کوپٹتا دیکھ کر درجنوں وکلا اپنے ساتھی کوچھڑانےآگئے اورملزم تنظیم عباس کے گھروالوں کو شدید تشدد کا نشانہ بنا ڈالا، اس دوران پولیس اہلکاروں نے بیچ بچاؤ کی کوشش کی تووکلا نے انہیں بھی مارنا شروع کردیا جب کہ وکلانے ایکسپریس نیوزکی ٹیم کوبھی تشدد کا نشانہ بنانے کے بعد کیمرہ چھین لیا۔