عمران خان کی قیادت میں پاکستان ترقی کرے گا چینی سفیر

وزیراعظم عمران خان کی ترجیحات متاثر کن ہیں، چینی سفیر، عمران خان سے ملاقات (فوٹو: نیوز ایجنسی)

---

چین کے سفیر یاؤجنگ نے کہا ہے کہ وزیر اعظم عمران خان کی ترجیحات متاثر کن ہیں مجھے یقین ہے کہ ان کی قیادت میں پاکستان ترقی کی منزل حاصل کرلے گا۔

چینی سفیر یاؤجنگ نے وزیراعظم سے ملاقات کے بعد خصوصی گفتگو کرتے ہوئے کہا کہ عمران خان سے ملاقات انتہائی مفید رہی، چینی قیادت، تاجر برادری اور عوام وزیراعظم عمران خان کے وژن کے معترف ہیں، وزیراعظم عمران خان کی ترجیحات متاثر کن ہیں ان کی جانب سے آسان کاروباری مواقع فراہم کرنا، گرین پاکستان اور معیشت کے لیے اقدامات لائق تحسین ہیں۔

چینی سفیر نے کہا کہ سرمایہ کاروں کو پاکستان لانے کے لیے بہترین اقدامات کیے جا رہے ہیں، برآمدات میں اضافے کے لیے پاکستان کی حکومت مؤثر کاوشیں کر رہی ہے، پاکستان کے مضبوط شراکت دار کی حیثیت سے تعاون جاری رکھیں گے، یقین ہے عمران خان کی قیادت میں پاکستان ترقی کی منزل حاصل کرے گا۔