پاکستان کرکٹ بورڈ نے برطانوی اخبار کی جانب سے پاکستان اور ویسٹ انڈیز کے درمیان کھیلی گئی ایک روزہ کرکٹ سیریز کے دوران میچ فکسنگ کے الزامات پر انٹرنیشنل کرکٹ کونسل سے رابطہ کر لیا ہے۔
نمائندہ ایکسپریس ٹریبیون سے بات کرتے ہوئے ایک پی سی بی اہلکار نے بتایا کہ بورڈ نے کرپشن کے حوالے سخت پالیسی اپنا رکھی ہے اور دورہ ویسٹ انڈیز کے دوران میچ فکسکنگ کے الزامات پر بورڈ کو شدید تشویش ہے اس لیے آئی سی سی سے بھی رابط کر لیا گیا ہے۔ پی سی بی اہلکار کا مزید کہنا تھا کہ اگر برطانوی اخبار ڈیلی میل کی جانب سے لگائے جانے والے الزامات غلط ثابت ہوئے تو بورڈ اس کے خلاف قانونی چارہ جوئی بھی کرسکتا ہے، بورڈ کی جانب سے اس حوالے سے باضابطہ بیان بھی جلد جاری کردیا جائے گا جب کہ امید ہے کہ آئی سی سی بھی میڈیا کو اپنا خصوصی بیان جاری کرے گے۔
واضح رہے کہ برطانوی اخبار ڈیلی میل میں شائع ہونے والی رپورٹ میں دعویٰ کیا گیا ہے کہ پاکستان اور ویسٹ انڈیز کے درمیان کھیلی گئی حالیہ ون ڈے سیریز کے تیسرے اور پانچویں ون ڈے مشکوک ہونے کے باعث آئی سی سی نے تحقیقات شروع کردی ہیں۔