کراچی میں فائرنگ سے پی ٹی آئی کے 2 کارکنان جاں بحق

کراچی پولیس چیف نے ڈی آئی جی ویسٹ سے فائرنگ کے واقعات کی تفصیلی رپورٹ طلب کرلی

ویب ڈیسک February 15, 2019

پی ٹی آئی رہنما خرم شیر زمان کی کارکنان کی ٹارگٹ کلنگ کی شدید مذمت۔ فوٹو: فائل

شہر قائد میں فائرنگ کے 2 مختلف واقعات میں پی ٹی آئی کے2 کارکنان جاں بحق ہوگئے ہیں۔

ایکسپریس نیوز کے مطابق کراچی کے علاقوں میں نامعلوم افراد کی فائرنگ کے نتیجے میں تحریک انصاف کے 2 کارکنان جاں بحق ہوگئے، سائٹ کے علاقے باوانی چالی میں موٹر سائیکل پر سوار3 نامعلوم ملزمان نے فائرنگ کی جس کے نتیجے میں 27 سالہ عبدالرحمٰن جاں بحق ہوگیا، دوسری جانب اورنگی ٹاؤن میں شفقت نامی شہری کو فائرنگ کا نشانہ بنایا گیا۔

میڈیا سے گفتگو میں پی ٹی آئی رہنما خرم شیر زمان کا کہنا تھا کہ کارکنان کی ٹارگٹ کلنگ کی شدید مذمت کرتے ہیں، حکومت اور پولیس شہریوں کی جان و مال کے تحفظ میں ناکام ہوگئی ہے، ڈی جی رینجرز سے گزارش ہے کہ واقعے کا نوٹس لیں۔ کراچی پولیس چیف نے ڈی آئی جی ویسٹ سے فائرنگ کے دونوں واقعات کی تفصیلی رپورٹ طلب کرلی ہے۔