نیشنل کمانڈ اتھارٹی کا اجلاس بھارت کو جواب دینے کیلیے اہم فیصلے

بھارتی جارحیت کے خلاف پارلیمنٹ کا مشترکہ اجلاس کل ہو گا۔ فوٹو: فائل

---

وزیراعظم عمران خان کی زیر صدارت نیشنل کمانڈ اتھارٹی کا خصوصی اجلاس ہوا جس میں بھارت کو جواب دینے کے لیے اہم فیصلے کیے گئے ہیں۔

ایکسپریس نیوز کے مطابق وزیراعظم عمران خان کی زیر صدارت نیشنل کمانڈ اتھارٹی کا خصوصی اجلاس ہوا جس میں تینوں مسلح افواج کے سربراہان سمیت چیئرمین جوائنٹ چیفس آف اسٹاف کمیٹی نے شرکت کی، اجلاس میں ملک کی موجودہ سیکیورٹی صورتحال اور بھارتی جارحیت پر پاکستان کی جانب سے ردعمل پر تفصیلی غور کیا گیا۔

ذرائع کے مطابق نیشنل کمانڈ اتھارٹی کے اجلاس میں بھارت کو جواب دینے کے لیے اہم فیصلے کیے گئے ہیں جب کہ پاکستانی حدود میں کسی بھی قسم کی دراندازی کا فوری اور موثر جواب دینے کا بھی فیصلہ کیا گیا ہے، اجلاس میں وزیراعظم عمران خان نے پاک فضائیہ کو لائن آف کنٹرول پر کی جانے والی کارروائی پر زبردست خراج تحسین بھی پیش کیا۔

دوسری جانب قومی سلامتی کمیٹی کا اجلاس آج دوسرے روز بھی وزیراعظم عمران خان کی زیر صدارت جاری رہے گا جب کہ بھارتی جارحیت کے خلاف پارلیمنٹ کا مشترکہ اجلاس کل ہوگا۔

اس خبر کو بھی پڑھیں : پاک فضائیہ نے 2 بھارتی طیارے مارگرائے

واضح رہے کہ پاکستان نے بھارت کوکرارا جواب دیتے ہوئے 2 بھارتی طیاروں کو مارگرایا جس کے نتیجے میں 2 بھارتی پائلٹس ہلاک ہوگئے جب کہ 2 بھارتی پائلٹ کو گرفتار بھی کرلیا گیا۔