دوستوں میں جھگڑے کے دوران تیز دھار آلے کے وار سے ایک ہلاک

مقتول اور ملزم میں ایک دوسرے سے موبائل فون چھیننے پر تلخ کلامی ہوئی تھی،ملزم گرفتار

---

کورنگی میں دوست نے دوست کو تیز دھار آلے کے وار کرکے ہلاک کردیا، پولیس نے ملزم کو گرفتار کرکے آلہ قتل برآمد کرلیا، تفصیلات کے مطابق کورنگی تھانے کی حدود بنگالی پاڑہ غریب نواز بستی سیکٹر 34/E کورنگی نمبر3کے رہائشی25سالہ سلمان حسین ولد میاں حسین کو اس کے پڑوسی جسیم عرف غفور بنگالی ولد جمال نے جھگڑے کے دوران تیز دھار آلے کے پے در پے وار کرکے ہلاک کردیا، پولیس نے موقع پر پہنچ کر علاقہ مکینوں کی مدد سے ملزم کو گرفتار کرکے آلہ قتل برآمد کرلیا۔

کورنگی تھانے کے تفتیشی افسر سب انسپکٹر سعید اﷲ نے ایکسپریس کو بتایا کہ ملزم اور مقتول پڑوسی اور بہت پرانے دوست تھے، دونوں نشا کرتے تھے، مقتول اسٹریٹ کرائم کی وارداتوں میں بھی ملوث تھا، مقتول اور ملزم کے درمیان ایک دوسرے سے موبائل فون چھیننے پر تلخ کلامی کے بعد ہاتھا پائی ہوئی تھی جس پر ملزم جسیم نے مشتعل ہو کر گھر سے گھاس کاٹنے والی درانتی لا کر سلمان پر پے در پے وار کردیے جس سے اس کی موقع پر ہی موت واقع ہوگئی، پولیس نے ملزم جسیم کیخلاف قتل کی ایف آئی آر نمبر 234/12 درج کرلی۔