لاہور ایئرپورٹ سے فلائٹ آپریشن بحال پروازوں کی آمدورفت شروع

تمام فضائی کمپنیوں کو آپریشن شروع کرنے سے متعلق آگاہ کردیا گیا

ویب ڈیسک March 03, 2019

پاک بھارت کشیدگی کے باعث تمام ہوائی اڈے کمرشل پروازوں کے لیے بند کر دیے گئے تھے فوٹو: فائل

KARACHI: کراچی، اسلام آباد، پشاور اور کوئٹہ ایئرپورٹس کے بعد علامہ اقبال انٹر نیشنل ایئرپورٹ سے بھی فلائٹ آپریشن بحال ہوگیا ہے۔

پاک بھارت کشیدگی کے باعث پاکستان کی فضائی حدود اور ہوائی اڈے کمرشل پروازوں کے لیے بند کر دیے گئے تھے، گزشتہ روز کراچی، اسلام آباد، پشاور اور کوئٹہ ایئرپورٹس پر فلائٹ آپریشن بحال کردیا گیا تھا جب کہ لاہور کے علامہ اقبال انٹر نیشنل ایئرپورٹ سے آج صبح فلائٹ آپریشن بحال کیا گیا ہے۔ تمام فضائی کمپنیوں کو آپریشن شروع کرنے سے متعلق آگاہ بھی کردیا گیا ہے۔

علامہ اقبال انٹر نیشنل ایئر پورٹ آپریشنل ہونے کے بعد پی آئی اے نے اپنی معمول کی پروازوں کا آغاز کر دیا ہے۔ پی آئی اے کے ترجمان کا کہنا ہے کہ ملکی سیکیورٹی کے غیر معمولی حالات کی وجہ سے مسافروں کو مشکلات کا سامنا کرنا پڑا جس کے لئے پی آئی اے معذرت خواہ ہے ڈسٹرکٹ مینیجر اور اسٹیشن مینجر کی نگرانی میں پی آئی اے کا عملہ مسافروں کی مکمل رہنمائی کے لئے پی آئی اے بکنگ دفاتر اور ایئر پورٹ پر موجود ہے۔ مسافروں سے رابطہ کر کے ان کو پروازوں کے شیڈول سے آگاہ کیا جارہا ہے۔
واضح رہے کہ ملتان ایئرپورٹ پر فلائٹ آپریشن پیر کو بحال کیا جائے گا۔