قرآن خزینۂ علم و عرفان

قرآنِ کریم میں متعدد جگہوں پر اللہ تبارک و تعالیٰ نے عوام الناس کو تعقّل، تفکّر اور تدبّر کی دعوت دی ہے۔

مولانا سیّد شہنشاہ حسین نقوی March 08, 2019

قرآنِ کریم میں متعدد جگہوں پر اللہ تبارک و تعالیٰ نے عوام الناس کو تعقّل، تفکّر اور تدبّر کی دعوت دی ہے۔ فوٹو : فائل

'' اور ہم نے قرآن کو نصیحت حاصل کرنے کے واسطے آسان کردیا، پس کوئی ہے جو نصیحت حاصل کرے۔'' قرآن امام اور رحمت ہے۔ قرآن زیبا ترین کلام ہے۔ قرآن شِفا ہے۔ رسولِ اکرم آنحضرت محمد مصطفی صلی اللہ علیہ وآلہٖ وسلم فرماتے ہیں، مفہوم : '' صادق ترین بات، بلیغ ترین وعظ و نصیحت اور احسن ترین قصہ کتابِ الہٰی (قرآنِ مجید) ہے۔ ''

حضرت علی مرتضیٰ کرم اللہ وجہہٗ کا ارشادِ گرامی ہے : '' کتابِ الٰہی کی تعلیم حاصل کرو کیوں کہ یہ بہترین کلام اور بلیغ ترین نصیحت ہے، نیز اِس میں غور و فکر کرو کیوں کہ یہ دلوں کی بہار ہے، اِس کے نور سے شِفا حاصل کرو، کیوں کہ یہ دلوں کی بیماریوں کے لیے شِفا ہے۔ اور اِس کی اچھے انداز میں تلاوت کرو، کیوں کہ یہ سب سے پیارا قصہ ہے۔'' (بحار الانوار۔ علّامہ مجلسیؒ)

قرآنِ کریم میں متعدد جگہوں پر اللہ تبارک و تعالیٰ نے عوام الناس کو تعقّل، تفکّر اور تدبّر کی دعوت دی ہے، بل کہ تاکید کی گئی ہے کہ سُنو اور سمجھو، غور و فکر کرو۔ اللہ کے نظام کو سمجھو۔ سنجیدگی اور خلوصِ دل کے ساتھ غور و خوض کرنے والا کسی بھی مسئلے میں راہِ حل کو پالیتا ہے۔

قرآن ہر زمانے میں نیا ہے۔ حضرت علی کرم اللہ وجہہٗ کا ارشادِ گرامی ہے: '' کثرت سے دہرایا جانا اور (بار بار) کانوں میں پڑنا، اسے (قرآن کو) پُرانا نہیں کرتا۔''

( بہ حوالہ: نہج البلاغہ۔ خطبہ 156)

قرآنِ کریم کی گراں قدر اہمیت و افادیت اور آفاقیت و ابدیت مسلّمہ ہے۔ اِس کا شاہ کار امام حسینؓ اور ان کے خانوادے نے کربلا میں پیش فرمایا کہ عصرِ عاشور میں اِن کا سرکٹ بھی جائے ، نیزے پر اُٹھا بھی دیا جائے، تب بھی وہ قرآن سے دُور نہیں ہوتے۔ قرآن اِن کے ساتھ جڑا رہتا ہے۔ سورۂ کہف کی تلاوت نوکِ نیزہ پر بھی سنائی اور دِکھائی دے رہی ہوتی ہے۔ یہ معجزۂ قرآن اور کرامتِ قرآن ہے۔ حضرت امام علی نقیؓ کی تعلیمات کی رُو سے ہمیں یہ آگاہی ملتی ہے، مفہوم: '' تمام اُمّت کا کاتب اور واضح اور روشن اتفاق ہے اور اس میں اُمّت میں کسی طور اختلاف نہیں ہے کہ یہی قرآن جو ہے ذی حق ہے، اور اس کی تنزیل میں کسی کی دو رائے نہیں ہیں۔''

آنحضرت محمد مصطفی صلی اللہ علیہ وآلہٖ وسلم ارشاد فرماتے ہیں، مفہوم : '' قرآن ایسی تونگری ہے جس کے ہوتے ہوئے کسی چیز کی ضرورت نہیں رہتی اور نہ ہی اُس کے ہوتے ہوئے کوئی محتاج رہتا ہے۔'' (بحار۔ جلد 92، صفحہ 19)

حضرت امام جعفر صادق رضی اللہ تعالیٰ عنہٗ فرماتے ہیں، مفہوم : ''جو قرآن کی تلاوت کرتا ہے وہ غنی ہے اور اس کے بعد پھر اسے کسی قسم کی ضرورت نہیں رہتی۔ اور اگر تلاوت نہیں کرتا تو وہ غنی نہیں ہے۔'' (بحار۔ جلد 92، صفحہ 187)

حضرت علی مرتضیٰ کرم اللہ وجہہٗ یوں راہ نمائی فرماتے ہیں: ''جان لو کہ قرآن ( کی تعلیمات) کے بعد (کسی اور لائحہ عمل کی) احتیاج نہیں رہتی اور نہ کوئی قرآن سے (کچھ سیکھنے سے) پہلے اس سے بے نیاز ہوسکتا ہے۔ اِس سے اپنی بیماریوں کی شِفا چاہو اور اپنی مصیبتوں پر اس سے مدد مانگو۔'' (نہج البلاغہ)

قرآن میں اوّلین اور آخرین کا علم ہے۔

آیت اللہ محمدی ری شہری اپنی بہترین تالیف ''میزان الحکمت'' جلد 8، صفحہ 124 پر رقم طراز ہیں: '' شیرِ خدا حضرت علی کرم اللہ وجہہٗ فرماتے ہیں : '' قرآن میں تم سے پہلے کی خبریں، تمہارے بعد کے واقعات اور تمہارے درمیانی حالات کے احکام موجود ہیں۔'' (نہج البلاغہ۔ حکمت 313 )

کنز العمال، حدیث2454 میں آنحضرت محمد مصطفی صلی اللہ علیہ وآلہ وسلم یوں راہ نمائی فرماتے ہیں : '' جو اوّلین و آخرین کا علم حاصل کرنا چاہتا ہے تو اُسے چاہیے کہ قرآن پڑھے اور اس کے معنی میں غور کرے۔''

احادیث اور روایات میں قرآن کی تعلیم حاصل کرنے کے متعلق بہت زیادہ تشویق دلائی گئی ہے۔ آنحضرت محمد مصطفی صلی اللہ علیہ وآلہٖ وسلم فرماتے ہیں : '' تم میں بہتر وہ ہیں، جو خود بھی قرآن کا علم حاصل کرتے ہیں اور دوسروں کو بھی اِس کی تعلیم دیتے ہیں۔'' (کنز العمال)

حماد بن عیسیٰؓ نے سند ِمرفوع کے ساتھ امیرالمومنین، امام المتقین حضرت علی کرم اللہ وجہہٗ سے روایت کی ہے کہ آنحضرت محمد مصطفی صلی اللہ علیہ وآلہٖ وسلم نے حضرت علی کرم اللہ وجہہٗ سے فرمایا: '' کیا میں تمہیں ایسی تعلیم نہ دُوں جس سے تم قرآن کو کبھی نہ بھولو؟ وہ دُعا یہ ہے۔

(ترجمہ) ''اے اللہ! جب تک تُو مجھے زندہ رکھے ہمیشہ کے لیے میرے گناہوں کی پردہ پوشی کرکے مجھ پر رحم فرما۔ جو چیز میرے لیے مفید نہیں ہے اس کے حصول سے باز رکھ، مجھ پر رحم فرما، جس چیز میں تیری رضامندی ہے اُس میں حُسنِ نظر عنایت فرما، جس طرح تُونے مجھے تعلیم فرمایا ہے اسی طرح اپنی کتاب کو یاد کرنے کے لیے میرے دل کو پابند بنا۔ مجھے توفیق عطا فرما کہ میں اسے ویسے ہی پڑھوں جیسے تیری رضا ہے۔ بارِ الٰہا! میری نگاہوں کو اپنی کتاب کے ساتھ منوّر فرما، اس کے ذریعے میرے سینے کو کشادہ کردے، میری زبان کو اِس (کی تلاوت) کے لیے رواں فرما، میرے جسم کو اِسی کے لیے استعمال کر اور اِس کے لیے مجھے قوت و طاقت عطا فرما، اِس کے لیے میری امداد فرما، کیوں کہ اِس پر صرف تُو ہی میری امداد کرسکتا ہے، تیرے علاوہ کوئی اور معبود برحق نہیں ہے۔'' (بحار۔ جلد 92، صفحہ 209)

قرآنِ کریم کو بار بار پڑھنے کی ترغیب دِلائی گئی ہے۔ حضرت امام جعفر صادق رضی اللہ تعالیٰ عنہٗ فرماتے ہیں : '' جو شخص قرآن مجید کی کوئی سورت بھلا دے گا تو وہ سورت قیامت کے دن ایک زیبا شکل میں اُس کے سامنے آجائے گی جو جنت کے بلند درجے پر ہوگی، وہ شخص اُسے دیکھ کر کہے گا، '' تُو کون ہے اور کس قدر حَسین ہے ؟ کاش تُو میری ہوتی!!'' وہ سورت جواب دے گی، کیا تُو مجھے نہیں پہچانتا؟ میں قرآن مجید کی وہی سورت ہوں جسے تُونے بھلا دیا تھا، اگر مجھے نہ بھلاتا تو آج میں تجھے اِس بلند مقام و مرتبے پر لے آتی۔'' (اصولِ کافی)

حاملینِ قرآن کے اَن گنت فضائل ہیں۔ آنحضرت محمد مصطفی صلی اللہ علیہ وآلہٖ وسلم کا ارشادِ گرامی قدر ہے: ''حاملینِ قرآن، قیامت کے دن عارف لوگ ہوں گے۔'' (کنزالعمال) ایک اور جگہ ارشاد فرمایا : ''میری اُمّت کے اَشراف، حاملینِ قرآن اور عابدانِ شب زندہ دار ہیں۔'' (الخصال۔ جلد1)

عربی زبان سے ہمیں اِس لیے عشق ہے کہ قرآنِ حکیم عربی زبان میں نازل ہوا ہے۔ قرآنِ کریم کے عشق کا تقاضا ہے کہ ہم سب یہ زبان صحیح طرح سیکھیں اور سمجھیں۔ یہ بے حد ضروری اور مفید ہے، دُنیا میں بھی اور عقبیٰ میں بھی۔ عصری تعلیم کے ساتھ قرآنی یعنی دینی تعلیم کا حصول بھی نسلِ نو کے لیے ناگزیر ہے۔

نبی مکرّم آنحضرت محمد مصطفی صلی اللہ علیہ وآلہٖ وسلم کی حدیثِ مُبارکہ ہے: '' جو شخص اپنی اولاد کو قرآن کی تعلیم دے، اللہ روزِ قیامت اُس کے والدین کو عزت کا تاج پہنائے گا اور جنت کا وہ لباس عطا فرمائے گا جس کو کبھی بھی کسی نے نہیں دیکھا ہوگا۔'' (مجمع البیان۔ جلد 1)

آئیے دُعا کرتے ہیں کہ اللہ رؤف و رحیم ہم سب کو اپنے حبیب کریم آنحضرت محمد مصطفی صلی اللہ علیہ وآلہٖ وسلم کے طفیل قرآنِ حکیم کی عمدہ انداز میں قرأت کرنے، حِفظ کرنے، سمجھنے اور اس کی تعلیمات پر عمل کرنے کی توفیق کرامت فرمائے۔ (آمین)