چین میں تیز رفتار کار سوار نے راہ گیروں کو کچل دیا 6 ہلاک

چین میں تیز رفتار کار سوار نے گاڑی راہگیروں پر چڑھادی جس کے نتیجے میں 6 افراد ہلاک ہوگئے۔

بین الاقوامی خبر رساں ادارے کے مطابق وسطی چینی کے ایک صوبے ہُوبئی میں ایک شخص نے فٹ پاتھ پر پیدل چلنے والوں پر کار چڑھا دی جس کے نتیجے میں 6 افراد ہلاک اور 7 زخمی ہو گئے۔ پولیس نے کار سوار شخص کو گولی مار کر ہلاک کردیا۔


پولیس کا کہنا ہے کہ صوبہ ہُوبئی کے شہر زاؤ یانگ میں ہونے والے واقعے میں تیز رفتار کارسوار نے دانستہ طور پر گاڑی راہ گیروں پر چڑھائی جس پر پولیس نے فوری ردعمل دیتے ہوئے کارسوار کو گولی مار دی۔

دوسری جانب مشرقی چین کے علاقے ین چینگ کے صنعتی علاقے میں ایک کیمیائی کارخانے میں دھماکے کے نتیجے میں 47 افراد ہلاک اور 600 سے زائد زخمی ہو گئے، 9 زخمیوں کی حالت نازک ہونے کے باعث ہلاکتوں میں اضافے کا خدشہ ظاہر کیا جا رہا ہے۔

واضح رہے کہ چینی صوبے یوہان میں رواں برس جنوری میں راہ گیروں پر کار چڑھانے کے واقعے میں بھی 15 افراد ہلاک ہوئے تھے۔