تحریک انصاف کے چیئرمین عمران خان نے ضمنی انتخابات کے دوران پولنگ اسٹیشنوں کے اندر اور باہر پاک فوج کی تعیناتی کا مطالبہ کر دیا ہے۔
لاہور میں عمران خان کی زیرصدارت اجلاس ہوا جس میں ضمنی انتخابات اورملک کی سیاسی صورتحال پر غور کیا گیا، اس موقع پرعمران خان کا کہنا تھا کہ ضمنی انتخابات میں دھاندلی کے لئے حکومتی مشینری کا بھرپور استعمال کیا جارہا ہے۔ عمران نے کہا کہ حکومت اپنے اقتدار کے پہلے 90 دن میں ہی گھٹنے ٹیک چکی ہے، ملک میں مہنگائی، بے روزگاری، لوڈشیڈنگ اور دہشت گردی کے مسائل عروج پر ہیں جو حکومت کی ناکامی کی دلیل دیتے ہیں۔ تحریک انصاف کے چیئرمین نے کہا کہ حالات مایوس کن ہیں اور بین الاقوامی سطح پر پاکستان تنہائی کا شکار ہے۔