بھرے بازار میں اندھا دھند فائرنگ تاجر رہنما جاں بحق

بھرے بازار میں مسلح افراد کی فائرنگ، انجمن تاجران کے صدر جاں بحق۔

تفصیلات کے مطابق جام صاحب پولیس اسٹیشن کی حدود میں شاہ پور چاکر چوک پر بیچ بازار میں مسلح ملزمان نے اندھا دھند فائرنگ کرکے انجمن تاجران جام صاحب کے صدر غلام قادر ڈاہری کو اتوار کی شب شدید زخمی کردیا اور عقب میں چھپی کار میں فرار ہوگئے۔




زخمی غلام قادر کو انتہائی تشویشناک حالت میں پی ایم اسی اسپتال نواب شاہ منتقل کردیا گیا جہاںوہ زخموں کی تاب نہ لاتے ہوئے جاں بحق ہوگئے۔ واقعے کے خلاف تاجروں کی اپیل پر شہر میں مکمل شٹرڈاؤن ہڑتال رہی اور بس اسٹاپ سے احتجاجی ریلی نکالی گئی اور مین چوک پر دھرنا دے کر مظاہرین نے ملزمان کی فوری گرفتاری کا مطالبہ کیا۔ تاجر رہنماؤں نے انتظامیہ کو شدید تنقید کا نشانہ بنایا۔ جام صاحب پولیس کے مطابق واقعہ پرانی دشمنی کا شاخسانہ ہے۔ تاحال مدعیوں کے نہ آنے کے باعث مقدمہ درج نہیں کیا جاسکا۔