ورلڈ ایتھلیٹکس یوسین بولٹ نے 100 میٹر ریس جیت لی

روس کے دارلحکومت ماسکو میں جاری ورلڈ ایتھلیٹکس چیمپئن شپ میں اولمپک گولڈ میڈلسٹ یوسین بولٹ نے 100 میٹر ریس جیت لی ہے۔

جمیکا سے تعلق رکھنے والے ایتھلیٹ نے9.77 سیکنڈز میں فاصلہ طے کرکے ٹائٹل اپنے نام کیا۔ یوسین بولٹ امریکی جسٹن گیٹلن سے ریس کے آخری مراحل میں آگے نکلے، جسٹن نے فاصلہ 9.85 سیکنڈز میں مکمل کیا۔ بولٹ نے تیز بارش میں فاتح بن کر ایک بار پھر بہترین ایتھلیٹ ہونے کا ثبوت دیا، انھوں نے بی بی سی سے بات چیت کرتے ہوئے کہا کہ میں فتح پر خوش ہوں تاہم زیادہ بہتر پرفارم کرنا چاہتا تھا، نجانے کیوں سیمی فائنل کے بعد میری ٹانگوں میں درد ہونے لگا، البتہ مجھے ورلڈ ریکارڈ تو قائم کرنا نہیں تھا۔




اس لیے ریس جیتنے پر ہی خوش ہوں،ویسے بھی جمیکا میں لوگ مجھ سے کم از کم فتح کی ضرور توقع رکھتے ہیں۔جسٹن نے جون میں روم میں یوسین بولٹ کو ہرایا تھا، انھوں نے کہا کہ میں جمیکن حریف کے قریب آنے لگا اور اپنی کارکردگی سے بہت خوش ہوں، میں آخری 30 میٹر پر آہستہ ہو گیا اور ایسا میں نے روم میں نہیں کیا تھا، جسٹن نے مزید کہا کہ بولٹ ریس کے آغاز پر خاص توجہ دے رہا ہے، روم میں بھی اس نے شاندار ابتدا کی، 6 فٹ 5 انچ قد سے بھی اسے خاصا فائدہ ہوتا ہے۔