معراج مظہرِکُن فیاکُون

شبِِ اسراء میں وہ بے مثال نعتِ رسولِ کریمؐ تکمیل کو پہنچی جو خود اللہ تعالیٰ نے تحریر فرمائی۔

فرحت علی بیگ April 03, 2019

شبِِ اسراء میں وہ بے مثال نعتِ رسولِ کریمؐ تکمیل کو پہنچی جو خود اللہ تعالیٰ نے تحریر فرمائی۔ فوٹو: فائل

واقعۂ معراج، اللہ تعالیٰ کی حضور اکرمؐ سے محبت اور احترام کی ایک لازوال اور نایاب مثال ہے۔ معراج النبیؐ میں بے شمار سبق آموز حکمتیں پنہاں ہیں۔

یہ واقعہ اللہ تعالیٰ کی زبردست قوت اور اس کائنات کی ہر اک شے کے تمام مثبت اور منفی پہلوؤں پر زبردست اور فیصلہ کن دست رس کا منہ بولتا ثبوت ہے۔ اس کا اندازہ آپ ایسے لگا سکتے ہیں کہ اللہ تعالیٰ کو حضور پاک ﷺ کے اس کائناتی سفر کی تکمیل کے لیے کسی دھاتی خول، کششِ ثقل کی قوتوں کے توڑ کے لیے راکٹ انجن، خلائی لباس، آکسیجن ماسک، سیٹ بیلٹس اور مدار کی قوتوں کی جمع تفریق کی ضرورت نہیں پڑی، بل کہ اللہ تعالیٰ ہی کے بنائے ہوئے دیگر کائناتی قوانین اللہ تعالیٰ کے حکم کی خود کار تکمیل کے لیے ہاتھ باندھے کھڑے تھے۔

حضرت جبرائیلؑ نے براق پر حضور پاک ﷺ کو سوار کیا اور یہ سفر یقینا ً حضور پاکؐ کی سفر کی دعا کے بعد کسی بھی ناگہانی حادثے سے مبّرا مکمل بے فکری کے ساتھ آگے کی منزلوں کی طرف شروع ہوا۔ واقعۂ معراج، اللہ تعالیٰ کی طرف سے واضح طور پر کُن فیاکون کا مظہر ہے۔ اس واقعے سے ثابت ہوا کہ جب اللہ تعالیٰ اپنے کسی حکم کو نافذ کرنے کی ٹھان لیتے ہیں تو کسی بھی قسم کی کوئی کم زوری، کوئی مجبوری، کوئی عذر، کوئی تنگی وقت اس کے آگے تاب نہیں لاسکتی۔ اسی لیے اللہ تعالیٰ نے سورۂ بنی اسرائیل میں فرمایا: '' پاک ہے ( یعنی ہر کم زوری سے مبرّا ہے ) وہ ذات جو اپنے بندے کو راتوں رات مسجد ِحرام سے مسجد ِاقصیٰ تک لے گیا جس کے آس پاس اس نے برکت رکھی ہے، اس لیے کہ ہم اسے اپنی قدرت کے نمونے دکھائیں۔''

سوال یہ ہے کہ قدرت کے نمونوں کا ادراک تو حضور اکرمؐ کو وحی، خواب یا کسی اور طریقے سے بھی کرایا جاسکتا تھا، جو بہ دستور اپنی جگہ مستند اور قابلِ یقین ہی ہوتا۔ مگر اللہ تعالیٰ نے حضرت ابراہیمؑ کی طرح حضور پاک ﷺ کو عین الیقین اور حق الیقین کی منزل پر لے جانا تھا لہٰذا یہ طریقہ اپنایا گیا۔ حضور پاک ﷺ، اللہ تعالیٰ کے مہمان بنے۔ آپؐ کو قُرب کی انتہاء نصیب ہوئی۔ عرش ِ معلیٰ پر وقوع پذیر ہونے والی یہ مہمان نوازی کس قدر شان دار ہے۔ یہاں اس دنیا میں ہی اللہ تعالیٰ تو انسان کی شہہ رگ سے بھی قریب ہے اور حضور پاک ﷺ کے ساتھ اللہ تعالیٰ کا یہ قُرب کسی بھی شک سے بالا تر تھا تو پھر اس طرح سدرۃ المنتہی تک جانے کے کیا معنی ہیں؟

قرآن ِ مجید کی بیان کردہ سورۂ بنی اسرائیل کی آیت کے تحت، قربتوں کا یہ پیمانہ اللہ تعالیٰ کی نشانیوں کے ذریعے اللہ تعالیٰ کی نعمت ِ علم تک رسائی کی وہ آخری حد پالینا تھا، جو عین الیقین اور حق الیقین کی صورت بالآخر اس ساری کائنات میں صرف اور صرف آپؐ کو نصیب ہوئیں۔ اور یوں وہ بے مثال نعت ِ رسولؐ تکمیل کو پہنچی جو خود اللہ تعالیٰ نے آپؐ کے اسوۂ حسنہ کی صورت تحریر فرمائی اور چوں کہ اسی حق الیقین کو آپؐ نے اپنی امت تک پورے صدق اور خلوص کے ساتھ تفویض کرنا تھا، اس لیے آپؐ نے اپنی امت میں اس عین الیقین اور حق الیقین کے تقاضوں کو ان کی زندگی میں دیکھنا چاہا۔ آپؐ نے ایک مرتبہ اپنے صحابہؓ کو کسی بات پر ہنستے دیکھا تو فرمایا کہ جو کچھ میں دیکھ چکا ہوں، تم دیکھ لو تو، تم کم ہنسو اور زیادہ روؤ۔

معراج میں آپؐ نے کس قسم کے علمی حقائق کا سامنا کیا، اس کی ایک مثال پیش ِ خدمت ہے۔ ہر آسمان پر پہنچنے پر آپؐ اور حضرت جبرائیلؑ اپنے آپ کو ایک دروازے پر پاتے۔ اس پر دروازے کو کھٹکھٹایا جاتا تو سوال ہو تا کہ کون ہے؟ حضرت جبرائیلؑ جواب میں فرماتے کہ میں جبرائیل ہوں۔ پھر پوچھا جاتا کہ آپ کے ساتھ کون ہیں؟ حضرت جبرائیل ؑ جواب میں کہتے کہ یہ حضرت محمد ﷺ ہیں۔ پھر پوچھا جاتا کہ کیا یہ بلائے گئے ہیں؟ پھر فرمایا جاتا : ہاں۔ جواب ملتا کہ آنا مبارک ہو۔ اور دروازہ کھول دیا جاتا۔ اس طرح اللہ تعالیٰ نے آپؐ کے ذریعے اپنی امت تک یہ پیغام پہنچایا ہے کہ اللہ تعالیٰ کے ہاں ہر کام ایک منظم انداز میں کیا جاتا ہے۔ اللہ تعالیٰ کے فرشتے اپنے ہر ایک فرض کو اس کی ادائی کے آخری معیار تک سر انجام دینے میں کسی طرح کی کوئی بھی کوتاہی نہیں کرتے اور سب کام ایک قانون اور ضابطے کے مطابق کیے جاتے ہیں۔

معراج النبیؐ کا ایک پہلو نہ صرف خود حضور پاک ﷺ کے لیے بل کہ ہم عام مسلمانوں کے لیے بھی ذریعۂ آزمائش ہے۔ جب آپؐ نے لوگوں کو اس کے بارے میں بتانا چاہا تو ابوجہل جیسے جاہل نے لوگوں کو اکٹھا کر کے اس بات پر خوب قہقہے لگائے کہ لیجیے پہلے اگر کوئی کمی تھی، تو وہ اب کے پوری ہوگئی کہ حضرت محمدؐ تو دیوانوں کی سی باتیں کرتے ہیں (نعوذ باللہ)۔ دوسری طرف حضرت ابوبکر صدیق ؓ جیسے ایمان والے جلیل القدر صحابی نے فوراً اس سفر اور اس کی بیان کردہ تفاصیل کی تصدیق کردی۔ ابوجہل جہنم رسید ہوا، جب کہ حضرت ابوبکر ؓ دنیا ہی میں جنت اپنے نام لکھوا گئے۔ آج کل کے ابوجہل یہ بھول جاتے ہیں کہ اللہ جب کچھ کرنا چاہتا ہے تو کہہ دیتا ہے کہ ہو جا، تو پھر ہر صورت اس ہونی کو ہوجانا پڑتا ہے۔

معراج کا اصل درس اللہ تعالیٰ کی کائنات پر مکمل بلاشرکت غیرے حکم رانی ہے۔ وہ مالک دوجہاں اور مختارکُل ہے۔ اسے کسی بھی کام کے لیے کسی کی بھی مدد کی ضرورت نہیں ہے۔ وہ بے نیاز اور خود مختار ہے۔ اس واقعۂ معراج سے ہمیں حضور سرور کائنات ﷺ کے مقام و مرتبے کا بھی اندازہ ہوتا ہے کہ جہاں اللہ تعالیٰ کی کائنات ہے، وہاں حضور سرور کائنات ﷺ رحمت اللعالمین ہیں، اور اللہ تعالیٰ کے دربار میں ان ہی اعمال کو شرف قبولیت بخشا جائے گا جو آپؐ کے بتائے ہوئے طریقے کے مطابق کیے جائیں گے۔