’اوینجرز اینڈ گیم‘ اوینجرز فلم سیریز کی چوتھی اور آخری کڑی ہو گی ڈائریکٹر

فلم ڈائریکٹر نے اعلان کیا ہے کہ اوینجرز فلم سیریز کی چوتھی کڑی 'اوینجرز اینڈ گیم' اس فلم سیریز کی آخری کڑی ہو گی۔


اوینجرز فلم سیریز کے ڈائریکٹر نے اعلان کیا ہے کہ 'اوینجرز اینڈ گیم' فلم سیریز کی چوتھی کڑی اور آخری کڑی ہو گی جس نے نمائش سے قبل ایڈوانس بکنگ میں ہی ہالی وڈ کی تمام فلموں کا ریکارڈ توڑ دیا۔

سال 2012 میں پہلی بار مارول سپر ہیروز ایک ساتھ فلم اوینجرز میں بڑی اسکرین پر پیش کیے گئے، فلم مداحوں میں ایسی مقبول ہوئی کہ اس نے دنیا بھر سے ایک عشاریہ پانچ بلین ڈالرز کما لیے۔ 2015 میں اس فلم کی اگلی کڑی 'اوینجرز ایج آف الٹرون' پیش کی گئی جس میں ایک بار پھر تھور، کیپٹن امریکا، ہلک، بلیک ویڈو اور آئرن مین بڑی اسکرین پر جلوہ گر ہوئے۔ فلم نے ایک بار پھر دنیا بھر میں ایک عشاریہ چار بلین ڈالرز کما کر باکس آفس پر دھوم مچائی۔

گزشتہ سال اس فلم کی تیسری کڑی 'اوینجرز انفنٹی وار' پیش کی گئی جس میں مارول کے نئے کردار متعارف کرائے گئے جن میں ڈاکٹر اسٹرینج اور بلیک پینتھر شامل تھے۔ اس فلم نے سیریز کی گزشتہ فلم کی کمائی کے تمام ریکارڈ توڑ دیئے اور باکس آفس پر دو بلین ڈالرز سے زیادہ کا بزنس کیا تاہم اس سال پیش کی جانیوالی اوینجرز کی چوتھی کڑی 'اوینجرز اینڈ گیم' اس فلم سیریز کی آخری کڑی ہو گی جس کیلیے لوگوں نے ٹکٹیں بلیک میں بیچنا شروع کر دی ہیں۔