نیب کا علیم خان سے متعلق بیان پر فواد چوہدری کیخلاف کارروائی کا عندیہ

نیب ہمیشہ قانون اور آئین کے مطابق اپنے فرائض انجام دینے پر یقین رکھتاہے، اعلامیہ، فوٹو: فائل

---

قومی احتساب بیورو(نیب) نے وفاقی وزیراطلاعات فواد چوہدری کے علیم خان سے متعلق بیان کا نوٹس لے لیا۔

نیب اعلامیہ کے مطابق علیم خان کے مقدمے پر وفاقی وزیر اطلاعات کے بیانات کا جائزہ لینے کافیصلہ کیا گیا ہے، نیب اس بات کا جائزہ لے گا کہ یہ بیانات نیب کی تحقیقات پر اثر انداز کی کوشش تو نہیں، یہ بھی دیکھا جائے گا کہ آیا فواد چوہدری نے نیب آرڈیننس کی خلاف ورزی تو نہیں کی، اگر یہ بات سامنے آئی کہ خلاف ورزی ہوئی ہے تو نیب وفاقی وزیر اطلاعات کے خلاف قانون کے مطابق کارروائی کرسکتاہے۔

علیم خان کا مقدمہ کم سنگین ہے، اگر اربوں روپے کھانے والے ملزموں کو اتنی آسانی سے ضمانت مل سکتی ہے تو ایک کاروباری آدمی کو جس پر سرکاری خزانے کو نقصان پہنچانے کا کوئ الزام نہیں ضمانت دی جانی چاہئے۔عام تاثر یہ ہے کہ علیم کو اپوزیشن کے شور کی وجہ سے ناکردہ جرم کی سزا دی جا رہی ہے۔

— Ch Fawad Hussain (@fawadchaudhry) April 13, 2019

اعلامیہ میں کہا گیا ہے کہ نیب بدعنوانی کے خاتمہ اور لوٹی گئی رقوم کی واپسی کیلئے کام کرنے والا سب سے بڑا ادارہ ہے، نیب کا تعلق کسی سیاسی جماعت، گروہ اور فرد سے نہیں ہے بلکہ نیب کی پہلی اور آخری وابستگی صرف ریاست پاکستان کے ساتھ ہے، اس لیے نیب ہمیشہ قانون اور آئین کے مطابق اپنے فرائض انجام دینے پر یقین رکھتاہے۔

یہ بھی پڑھیں: شہباز شریف کی رہائی نیب کے لیے لمحہ فکریہ ہے، فواد چوہدری

واضح رہے کہ وزیراطلاعات نے ٹوئٹر بیان میں لکھا تھا کہ علیم خان کا مقدمہ کم سنگین ہے اور انہیں اپوزیشن کے شور کی وجہ سے ناکردہ جرم کی سزا دی جا رہی ہے۔