اداکارشان کی بالی ووڈ کنگ خان کوبڑی نصیحت

شاہ رخ خان کی فلم’زیرو‘باکس آفس پر ناکام ہوگئی تھی، فوٹوفائل

---

پاکستان فلم انڈسٹری کے اداکارشان نے بالی ووڈ کنگ شاہ رخ خان کو نصیحت کرتے ہوئے کہا ہے کہ انسان کو اپنا اعتماد کبھی نہیں کھونا چاہئے۔

اداکارشان نہ صرف شوبز معاملات میں بلکہ ملکی اورسیاسی معاملات میں بھی اکثرکھل کر اپنی رائے کا اظہار کرتے نظر آتے ہیں اس کے علاوہ وہ کئی مواقعوں پر پاکستانی اداکاروں کو مختلف نصیحتیں بھی کرچکے ہیں جن میں ہانیہ عامر اورعاصم اظہر کا واقعہ ابھی تازہ ہے جس میں انہوں نے دونوں کو اپنے رشتے کے احترام کا درس دیا تھا۔ تاہم اب انہوں نے بالی ووڈ کنگ شاہ رخ خان کو بڑی نصیحت کردی ہے۔

اس خبرکوبھی پڑھیں: شان نےعاصم اظہر اور ہانیہ عامر کی دوستی پر نئی بحث چھیڑ دی

حال ہی میں ایک انٹرویو کے دوران جب بالی ووڈ کے بادشاہ شاہ رخ خان سے ان کی اگلی فلم کے حوالے سے سوال پوچھا گیا تو انہوں نے کہا اس وقت میں نے اپنے اگلے پروجیکٹ کے حوالے سے کوئی فیصلہ نہیں کیا ہے، اپنی اگلی فلم کے حوالے سے مجھےجو بھی فیصلہ کرنا ہوگا وہ میں جون کے مہینے میں کروں گا۔

کنگ خان کے اس جواب سے ظاہرہے کہ وہ ''زیرو'' کی ناکامی کے بعد فلموں کے انتخاب میں محتاط ہوگئے ہیں اور اگلی فلم کے حوالے سے بہت سوچ سمجھ کر فیصلہ کریں گے۔ تاہم اداکار شان نے شاہ رخ خان کو نصیحت کرتے ہوئے کہا ہے کہ جب ایک اداکار اپنی صلاحیتیں دکھانے کا جذبہ اور اعتماد کھودے تو پھر یہی جواب سامنے آتا ہے(جو شاہ رخ خان نے دیا ہے)۔ آپ کی بھوک کبھی ختم نہیں ہونی چاہئے، ان تمام اداکاروں کو دیکھیں جنہوں نے کامیاب ہونے کے بعد کیا کیا، انہوں نے خود کو چیلنج کیا وہ سب کرنے کے لیے جو وہ کرنا چاہتے تھے، کردار ایک اداکار کے اندر سے آتا ہے۔

When the actor loses confidence & his passion to show his craft .that’s the answer you get .the hunger should never die .follow All the great actors ,what they did after they became greats .. they challenged themselves with what they wanted to do..the role comes from inside.

— Shaan Shahid (@mshaanshahid) April 18, 2019

واضح رہے کہ ایک دورمیں خانز کو بالی ووڈ فلموں کی کامیابی کی ضمانت سمجھا جاتا تھا تاہم گزشتہ کچھ عرصے سے بالی ووڈ کے تینوں خانوں کے ستارے گردش میں ہیں بالی ووڈ کنگ شاہ رخ خان کی گزشتہ برس ریلیز ہونے والی فلم 'زیرو' شائقین کو متاثر کرنے میں ناکام رہی اور فلاپ ہوگئی۔