نئے ڈی جی رینجرز سندھ میجر جنرل عمر بخاری نے چارج سنبھال لیا

میجر جنرل محمد سعید نے ڈی جی رینجرز کے عہدے کی ذمے داریاں میجر جنرل عمر احمد بخاری کے سپرد کیں، فوٹو: ایکسپریس

---

سندھ کے نئے ڈائریکٹر جنرل رینجرز میجر جنرل عمر احمد بخاری نے اپنے عہدے کی ذمے داریاں سنبھال لیں۔

ترجمان رینجرز کے مطابق اس سلسلے میں ایک پروقار تقریب رینجرز ہیڈ کوارٹر کراچی میں منعقد ہوئی جس میں میجر جنرل محمد سعید نے ڈی جی رینجرز کے عہدے کی ذمے داریاں میجر جنرل عمر احمد بخاری کے سپرد کیں وہ پاکستان رینجرز سندھ کے چودہویں ڈائریکٹر جنرل ہیں۔

دوسری جانب وزیر اعلی ہاؤس کے ترجمان کے مطابق وزیر اعلیٰ سندھ مراد علی شاہ کی سبک دوش ڈی جی رینجرز میجر جنرل محمد سعید سے الوداعی ملاقات ہوئی جس میں سندھ رینجرز کے نئے ڈی جی میجر جنرل عمر احمد بخاری بھی موجود تھے۔

وزیراعلیٰ سندھ نے میجر جنرل محمد سعید کی خدمات کو سراہا اور نئے ڈی جی رینجرز میجر جنرل عمر احمد بخاری کو خوش آمدید کہا۔ مراد علی شاہ نے سبک دوش ڈی جی رینجرز میجر جنرل محمد سعید اور نئے ڈی جی رینجرز کو شیلڈ، اجرک اور سندھی ٹوپی کے تحائف دیے۔