پاکستان اپنے بجٹ میں ترقیاتی اخراجات برقرار رکھے آئی ایم ایف

آئی ایم ایف اس بات کے حق میں نہیں کہ پاکستان اپنے ترقیاتی اخراجات میں کمی کرے، ارنسٹ ریگو

Shahbaz Rana May 04, 2019

پلاننگ سیکریٹری ظفرحسن کی آئی ایم ایف کے پاکستان کیلیے ہیڈ آف مشن سے ملاقات۔ فوٹو: فائل

آئی ایم ایف کا کہناہے کہ پاکستان اپنے بجٹ میں ترقیاتی اخراجات برقرار رکھے۔

وزات منصوبہ بندی کے مطابق پلاننگ، ڈیولپمنٹ اینڈریفارم سیکریٹری ظفرحسن سے ملاقات میں آئی ایم ایف کے پاکستان کیلیے ہیڈ آف مشن ارنسٹ ریگو نے ان خیالات کا اظہارکیا۔ ارنسٹ ریگو پاکستان کومالی بحران سے نکالنے کیلیے قرضے کے اجرا پر کام کرنے والی آئی ایم ایف ٹیم کے سربراہ ہیں۔

پلاننگ سیکریٹری نے آئی ایم ایف حکام کو بتایاکہ ترقیاتی اخراجات میں کمی کرنے سے حکومت کو مشکلات کا سامناہے۔ ارنسٹ ریگوکاکہناتھا کہ آئی ایم ایف اس بات کے حق میں نہیں کہ پاکستان اپنے ترقیاتی اخراجات میں کمی کرے، آئی ایم ایف چاہتاہے کہ پاکستان نئے بجٹ میں ترقیاتی اخراجات کا تحفظ کرے۔