سی ویو پر گورنر سندھ کے پروٹوکول کی وڈیو بنانا چینی باشندوں کو مہنگا پڑ گیا
گورنر سندھ عمران اسماعیل کا پروٹوکول سی ویو کے قریب گزر رہا تھا تو وہاں موجود 2 چینی باشندوں نے وڈیو بنانا شروع کر دی۔ اس مشکوک عمل کو دیکھتے ہوئے ساحل پولیس نے دونوں چینی باشندوں کو حراست میں لے کر تھانے منتقل کیا اور ان کے موبائل فونز و یگر دستاویزات کو قبضے میں لے کر جانچ پڑتال کی گئی۔
دونوں چینی باشندوں سے تحقیقات کی گئی تو انھوں نے بتایا کہ وہ ایک پروجیکٹ پر کام کر رہے ہیں اور گزشتہ 8 سال سے اسی علاقے میں رہائش پذیر ہیں جبکہ ان کے پاس تمام قانونی دستاویزات موجود ہیں تاہم انھیں اس بات کا علم نہیں تھا کہ سیکیورٹی کے حوالے سے کسی پروٹوکول کی وڈیو بنانا منع ہے۔
ایس ایچ او ساحل انسپکٹر غزالہ نے بتایا کہ پولیس نے کسی بھی چینی باشندے کو حراست میں نہیں لیا تاہم چینی باشندوں کی جانب سے وڈیو بنانے کی اطلاع پر پولیس موقع پر پہنچی تھی اور پوچھ گچھ کے بعد انھیں جانے کی اجازت دیدی گئی۔