حج کوٹہ نیلامی کیس سپریم کورٹ نے لاہورہائیکورٹ کا فیصلہ کالعدم قرار دیدیا

لاہور ہائیکورٹ نے حج کوٹہ کیس کے فیصلے میں نیلامی کے ذریعے سب سے سستا حج کرانے والے ٹور آپریٹرز کو کوٹہ الاٹ کرنے کا حکم دیا تھا۔ فوٹو: فائل

---

سپریم کورٹ آف پاکستان نے جج کوٹے کی نیلامی سے متعلق لاہورہائی کورٹ کے فیصلے کو کالعدم قرار دیتے ہوئے کہا ہے کہ عدالت کو یہ اختیار نہیں ہے کہ وہ حج کوٹہ کی نیلامی کا حکم دے۔

جسٹس تصدق حسین جیلانی کی سربراہی میں 2 رکنی بینچ نے حج کوٹہ کیس کی سماعت کی، سماعت کے دوران سپریم کورٹ نے حکم دیا کہ عدلیھ کو اختیار نہیں ہے کہ وہ ایگزیکٹیو کی پالیسی معاملات میں مداخلت کرے اور حج کوٹہ کی نیلامی کا حکم دے۔

اس سے قبل 30 جولائی کو حج کوٹہ کیس کی سماعت کے دوران سپریم کورٹ نے کوٹے کی تقسیم کے فیصلے کو کالعدم قرار دیتے ہوئے حکم دیا تھا کہ کوٹے کی تقسیم حج پالیسی 2013 کے مطابق کی جائے۔

واضح رہے کہ لاہور ہائی کورٹ نے حج کوٹہ کیس کے فیصلے میں نیلامی کے ذریعے سب سے سستا حج کرانے والے ٹور آپریٹرز کو کوٹہ الاٹ کرنے کا حکم دیا تھا جس کے تحت 2 لاکھ 50 ہزار روپے تک حج کرانے والے ٹور آپریٹرز کو کوٹہ الاٹ کیا جانا تھا۔